Дата правядзення
Час правядзення
Месца правядзення
З 1 лістапада па 11 снежня ў зале беларускай літаратуры (пам. 205) праходзіць выстаўка “Барысаў – горад славуты, горад старажытны”, прымеркаваная да 920-годдзя з дня заснавання горада.
На маляўнічым беразе ракі Бярэзіна размешчаны горад Барысаў, заснаваны князем полацкім Барысам-Рагвалодам у 1102 годзе і названы яго імем. На працягу ўсей сваёй больш чым 900-гадовай гісторыі горад займаў важнае стратэгічнае значэнне. Аб жыцці Барысава ў розныя гістарычныя перыяды і яго багатай культурнай спадчыне выдадзены навуковыя працы, артыкулы, навукова-папулярныя кнігі, выяўленчыя альбомы, памяткі, ілюстрацыйныя матэрыялы, якія шырока прадстаўлены ў экспазіцыі.
У раздзеле “Дакрануцца да сівой даўніны” можна пазнаёміцца з працай археолага, гісторыка, заснавальніка беларускай навуковай археалогіі, даследчыка старажытнасцяў Міншчыны Яўстафія Тышкевіча: “Описание Борисовского уезда”. Прадстаўлены таксама выданні “Город Борисов Минской губернии” (1910), “Дзевяць стагоддзяў Барысава” і інш.
Ваенная гісторыя горада, падзеі 1812 года, Вялікай Айчыннай вайны, партызанская барацьба Барысава адлюстравана ў раздзеле “Рэліквіі ратных подзвігаў” – кнігах “Над Бярозай” В. Пашкевіча, “Чтобы знали, чтобы помнили…”, “Города воинской славы Минской области”, “Г. Борисов и Борисовский уезд в Отечественную войну 1812 года” У. Краснянскага, “Война 1812 года: военное искусство, военно-экономическое противоборство, гуманитарные аспекты” і інш.
У 1871 г. была пабудавана Маскоўска-Брэсцкая чыгунка. На правым беразе ракі ўзніклі чыгуначная станцыя і гандлёва-прамысловы пасад Нова-Барысаў. У горадзе дзейнічалі дзве запалкавыя фабрыкі “Вікторыя” і “Бярэзіна”, папяровая фабрыка “Папірус”, крыштальная фабрыка “Барысаў”, смалакурная і шкіпінарная, кафляна-ганчарная і ганчарна-пасудная вытворчасці, чыгуналіцейны і лесапільны заводы і інш. На верфі будаваліся параходы. Некаторыя прадпрыемствы працуюць да нашых дзён. Гісторыю прамысловасці Барысава, яго багатай архітэктурнай спадчыны ілюструюць матэрыялы раздзела “Старадаўнія рамёствы і сучасная вытворчасць”.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 16.
Матэрыял пададзены аддзелам абслугоўвання спецыялізаванымі фондамі.