Майстар-клас па роспісе абярэгавых яек у тэхніцы “пісанка”

Нацыянальная бібліятэка працягвае серыю майстар-класаў з удзелам вядомых майстроў народнай творчасці ў рамках выставачнага праекта “Фарфоравае асарці”.

6 і 13 красавіка а 15-й у выставачным комплексе (пам. 104) адбудуцца сустрэчы з членам Беларускага саюза майстроў народнай творчасці Ганнай Клімовіч па роспісе абярэгавых яек у тэхніцы “пісанка”.

Распісаныя ўручную сюжэтнымі або арнаментальнымі ўзорамі “пісанкі” – традыцыйны від народнай творчасці, які не губляе сваёй папулярнасці і сёння. Толькі вопытныя майстры ведалі, як распісаць яйка так, каб яно стала абярэгам. З асаблівай стараннасцю яны выводзілі на шкарлупіне мудрагелістыя выявы старажытнаславянскіх сімвалаў уперамешку з расліннымі ўзорамі, пасля чаго арнамент пакрывалі фарбай патрэбнага колеру, а затым воскам. Людзі верылі, што абярэгавая пісанка на яйку абароніць іх ад бед і зла, дапаможа сабраць багаты ўраджай. Таму яйкі могуць пакрывацца сотнямі абярэгавых сімвалаў, кожны з якіх абараняў ад розных пошасцей. Абярэгавыя яйкі выкідваць было нельга, іх спальвалі або закопвалі ў зямлю.

На майстар-класе вы зможаце пазнаёміцца з традыцыйнай тэхнікай роспісу святочных яек і вырабіць унікальны абярэг уласнага дызайну, які стане арыгінальным атрыбутам аховы ад злых сіл.

Для ўдзелу ў майстар-класе неабходна:

• абавязкова зарэгістравацца: (8 017) 293 27 50;
• прынесці з сабой некалькі белых сырых яек для іх далейшага роспісу.

Наведванне майстар-класа ўваходзіць у кошт наведвання выставы “Фарфоравае асарці”:

• для дарослых – 7 руб.
• для навучэнцаў сярэдніх, сярэдніх спецыяльных і вышэйшых навучальных устаноў (пры прад’яўленні дакумента) – 5 руб.

Час работы выстаўкі адпавядае рэжыму работы бібліятэкі.

Тэлефоны для даведак: (8 017) 368 37 37, 293 27 50.