Пісьменнік-грамадзянін

Юбілейная кніжная выстаўка “Пісьменнік-грамадзянін”, прысвечаная 100-годдзю з дня нараджэння Алеся Савіцкага (1924–2015), праходзіць з 6 студзеня па 4 лютага ў зале беларускай літаратуры (пам. 205).

Аляксандр Ануфрыевіч – аўтар мастацкай і дакументальнай прозы. Сваю літаратурную дзейнасць ён пачаў яшчэ ў партызанскім атрадзе. Асэнсаванне тых выпрабаванняў, што выпалі на долю чалавека, і асабіста перажытага ў гады вайны, дазволілі пісьменніку стварыць шэраг твораў аб гэтым цяжкім для краіны часе. Яго мастацкую спадчыну можна назваць своеасаблівым летапісам мінулых падзей. У ракурсе адлюстравання знаходзілася і ваеннае, і пасляваеннае жыццё Беларусі, убачанае пісьменнікам-франтавіком.

Вызначальнай для ўсёй творчасці А. Савіцкага стала і тэма выпраўлення чалавека, яго маральнага і духоўнага станаўлення як асобы ў складанасцях паўсядзённага быцця. Праз творы пісьменнік сцвярджае спрадвечныя каштоўнасці, маральныя нормы, што складаюць сутнасць жыцця беларуса: дабро, прыгажосць, мір, шчасце, каханне, сям’я, праца, любоў да роднай зямлі, захаванне памяці пакаленняў.

Юбілейная выстаўка “Пісьменнік-грамадзянін” складаецца з раздзелаў: “Творчыя здабыткі Алеся Савіцкага”, “Дзіцячая палічка: Алесь Савіцкі дзецям”, “Старонкі жыцця і творчасці”. У іх прадстаўлены асобныя выданні твораў пісьменніка, у тым ліку ў перакладах на іншыя мовы, публікацыі ў калектыўных зборніках і перыядычных выданнях, літаратурна-крытычныя матэрыялы аб творчасці пісьменніка, выданні з біяграфічнымі звесткамі.

Тэлефон для даведак: (8 017) 293 27 16.