Сёння аддалена можна працаваць з паўнатэкставымі, графічнымі і іншымі інфармацыйнымі рэсурсамі НББ, выкарыстоўваючы “Віртуальныя праекты, выстаўкі і калекцыі” ў раздзеле “Інфармацыйныя рэсурсы” партала, вэб-навігатар “Беларусь у інфармацыйнай прасторы”, а таксама базы даных, якія агрэгіруе НББ.
У вэб-навігатары “Беларусь у інфармацыйнай прасторы” ў раздзеле “Рэсурсы Нацыянальнай бібліятэкі Беларусі” даецца больш за 40 спасылак на электронныя рэсурсы ўласнай генерацыі.
Гэта поўныя тэксты ўнікальных кніжных помнікаў Беларусі, прадстаўленыя ў праекце “Кніга Беларусі XIV–XVIII стагоддзяў”, віртуальнай рэканструкцыі кніжнага збору “Сапегіяна”, “Дзяржаўным рэестры кніжных помнікаў Беларусі” і інш.
Прадстаўлены ўсе выпускі “Памятных кніжак...” (выданні сярэдзіны XIX – пачатку ХХ ст.), якія тычацца беларускіх тэрыторый і якія дазваляюць прасачыць дынаміку іх сацыяльна-эканамічнага і культурнага развіцця:
- “Памятныя кніжкі Віленскай губерні (1845–1915)”
- “Памятныя кніжкі Віцебскай губерні (1861–1914)”
- “Памятныя кніжкі Гродзенскай губерні (1847–1915)”
- “Памятныя кніжкі Мінскай губерні (1845–1916)”
- “Памятныя кніжкі Магілёўскай губерні (1853–1916)”
У электронным рэсурсе “Лічбавы калейдаскоп” можна пазнаёміцца з унікальнымі краявіднымі і тэматычнымі электроннымі калекцыямі:
“Беларуская літаратурная спадчына. Часопісы 1919–1939 гг.” – лічбавыя копіі беларускіх часопісаў, выдадзеных на тэрыторыі БССР, заходнебеларускіх зямель і за іх межамі, якія адлюстроўваюць літаратурны працэс 1920-х і 1930-х гадоў;
“Мода і час” – электронныя копіі айчынных і замежных кніг, часопісаў, выяўленчых выданняў, асобных артыкулаў і ілюстрацый, у якіх прадстаўлены модныя фасоны жаночай, мужчынскай і дзіцячай вопраткі з XVI па XX ст.
Ваенныя падзеі розных эпох адлюстраваны ў віртуальных праектах: “1812 год у гісторыі Беларусі”, “Беларусь у Першай сусветнай”, “Памяць палаючых гадоў”, “100 дзён да Перамогі” і інш.
Шэраг паўнатэкставых рэсурсаў прысвечаны выдатным асобам, якія з’яўляюцца гонарам Беларусі:
- "Класікі сусветнай літаратуры Янка Купала і Якуб Колас"
- "Дзівосны свет Язэпа Драздовіча"
- “Юзаф Ігнацый Крашэўскі (1812–1887) = Jozef Ignacy Kraszewski = Юзеф Ігнацій Крашевський = Юзеф Игнаций Крашевский”
- "Віртуальнае падарожжа з Янкам Маўрам"
- "Станіслаў Манюшка. Музычны рамантык з Міншчыны"
- “Спадчына Наполеона Орды”
- “Адысея Саламеі Русецкай: ад Стамбула да Пецярбурга”
- “Паэт прыгажосці і гармоніі” (пра Максіма Багдановіча)
- “Не пакідайце ж мовы нашай беларускай…” (пра Францішка Багушэвіча)
- "Залатыя кросны душы" (пра Янку Брыля)
- “Споведзь мужнасці і любові” (пра Міхаіла Савіцкага)
- “Майстры беларускай культуры. Яўген Глебаў”
- “Славуты бібліёграф XX стагоддзя А.А. Сакольчык: да 120-годдзя з дня нараджэння”
Дзейнасць літаратурнага аб’яднання “Маладняк” прадстаўлена ў віртуальным праекце “На хвалі часу, у плыні жыцця”.
Унікальнаму прыроднаму аб’екту, які ўключаны ў Спіс сусветнай спадчыны ЮНЕСКА, прысвечаны рэсурс “Запаветны напеў, запаветная даль... Белавежская пушча”.
Найважнейшыя напрамкі супрацоўніцтва Рэспублікі Беларусь і ЮНЕСКА на працягу больш за паўстагоддзя адлюстраваны ў рэсурсе “ЮНЕСКА і Беларусь: вехі супрацоўніцтва ”.
Біяграфіі вядомых людзей нашай краіны і найбольш важныя падзеі розных сфер яе жыцця прадстаўлены ў базе даных “Беларусь в лицах и событиях = Беларусь у асобах і падзеях”. Звесткі даведачнага характару пра вышэйшыя навучальныя ўстановы і вучоных – у рэсурсе “Вучоныя Беларусі”.
Вышэйназваныя і іншыя рэсурсы, створаныя Нацыянальнай бібліятэкай Беларусі (у тым ліку ў партнёрстве з іншымі ўстановамі), раскрываюць на паўнатэкставым узроўні бібліятэчныя фонды і будуць карысныя для навуковай, адукацыйнай, самаадукацыйнай дзейнасці.
Жадаем плённай аддаленай працы з нашымі рэсурсамі!
Матэрыял падрыхтаваны спецыялістамі падраздзялення па фарміраванні інфармацыйных рэсурсаў.