15 мая ў рамках цыкла адкрытых анлайн-лекцый “Сучасная бібліятэка” адбылася лекцыя загадчыцы аддзела даведачна-інфармацыйнага абслугоўвання Алены Тулупавай для калег і студэнтаў бібліятэчных факультэтаў універсітэтаў культуры з Расіі, Беларусі і Украіны.
Арганізатарамі лекцыі выступілі кафедра бібліятэчна-інфармацыйнай дзейнасці Чалябінскага дзяржаўнага інстытута культуры і Савет маладых вучоных Беларускага дзяржаўнага ўніверсітэта культуры і мастацтваў.
Тэма лекцыі “Практыка віртуальнага інфармацыйна-бібліяграфічнага абслугоўвання” выклікала жывую цікавасць калег, паколькі ў рэжыме закрытых чытальных залаў бібліятэкі актыўна шукаюць новыя формы віртуальнага ўзаемадзеяння з карыстальнікамі. Да зум-лекцыі падключыліся каля 100 слухачоў з Чалябінскай, Курганскай, Цюменскай, Кемераўскай, Свярдлоўскай, Ленінградскай абласцей, Рэспублікі Башкірыя, Рэспублікі Удмуртыя Расійскай Федэрацыі, прадстаўнікі бібліятэчнай супольнасці з Мінска, Арла, Харкава і Марыупаля.
У ходзе выступлення А.В. Тулупава пазнаёміла ўдзельнікаў сустрэчы з асноўнымі напрамкамі работы Нацыянальнай бібліятэкі Беларусі ў анлайн-асяроддзі і інструментамі інфармацыйна-бібліяграфічнага абслугоўвання, такімі як:
- Discovery-пошук у вэб-каталогу бібліятэкі;
- базы даных і рэсурсы адкрытага доступу;
- віртуальнае кансультаванне з магчымасцю зваротнай сувязі;
- інтэрнэт-магазін інфармацыйных паслуг;
- бібліяграфічныя паслугі анлайн;
- дыстанцыйнае навучанне карыстальнікаў з прымяненнем інфаграфікі і тэхналогіі скрынкастынгу;
- віртуальная чытальная зала і шэраг іншых рэсурсаў і сэрвісаў.
Пасля лекцыі ўдзельнікі ажыццявілі інтэрнэт-навігацыю па старонках партала Нацыянальнай бібліятэкі Беларусі, а таксама змаглі задаць і атрымаць адказы на ўсе пытанні. Сустрэча прадэманстравала адсутнасць межаў і адлегласцей для прафесійных зносін, а таксама жаданне бібліятэчнай супольнасці разам вырашаць хвалюючыя ўсіх задачы.
Жадаючыя могуць пазнаёміцца з прэзентацыяй да лекцыі.
Матэрыял прадастаўлены аддзелам даведачна-інфармацыйнага абслугоўвання.
