26 мая ў Беларускім дзяржаўным архіве-музеі літаратуры і мастацтва прайшлі ХХІІ Узвышаўскія чытанні “Беларускія пісьменнікі ваеннага пакалення: лёсы і творы”, прымеркаваныя да Года гістарычнай памяці і стагоддзя Дзяржаўнай архіўнай службы Беларусі.
У канферэнцыі прынялі ўдзел супрацоўнікі Нацыянальнай бібліятэкі Беларусі. Ірына Кукета, галоўны бібліятэкар навукова-даследчага аддзела бібліятэказнаўства, пазнаёміла прысутных з навукова-даследчай дзейнасцю бібліятэкі па вывучэнні гісторыі станаўлення і развіцця бібліятэчнай справы Беларусі, прэзентавала электронныя інфармацыйныя рэсурсы “Станаўленне і развіццё бібліятэк Беларусі: архіўныя дакументы” і “Бібліятэчная справа Беларусі ў дакументах і матэрыялах”. У сваім выступленні Ірына распавяла пра асаблівасці карыстання і пошукавыя магчымасці рэсурсаў, нагадала пра знакавую падзею – 100-годдзе Нацыянальнай бібліятэкі, якое будзе адзначацца 15 верасня.
Ужо чацвёрты год бібліятэка рэалізуе маштабны сумесны праект “На хвалі часу, у плыні жыцця”, прымеркаваны да 100-годдзя літаб’яднання “Маладняк”, адным з партнёраў якога з’яўляецца Беларускі дзяржаўны архіў-музей літаратуры і мастацтва. Сёлета ў межах праекта была створана новая віртуальная экспазіцыя, прысвечаная 120-годдзю з дня нараджэння паэта Язэпа Пушчы. Адным з яе значных раздзелаў з’яўляецца “Фотагалерэя”, большасць якой складаюць фатаграфіі з фондаў архіва-музея. У паведамленні Юліі Амосавай, галоўнага бібліёграфа інфармацыйна-аналітычнага аддзела, былі акрэслены важныя падзеі жыцця Язэпа Пушчы, асаблівасці яго лёсу праз прызму лістоў, фотаздымкаў і асабістых дакументаў пісьменніка, размешчаных у праекце.
Нагадваем, што ў Нацыянальнай бібліятэцы захоўваюцца зборнікі матэрыялаў “Узвышаўскіх чытанняў”, а таксама альманах “Аўтограф”, у якім можна пазнаёміцца з тэкстамі дакладаў мінулых гадоў.
Дзякуем Беларускаму дзяржаўнаму архіву-музею літаратуры і мастацтва за арганізацыю канферэнцыі і нашу сумесную плённую працу!
Матэрыял падрыхтаваны інфармацыйна-аналітычным аддзелам і навукова-даследчым аддзелам бібліятэказнаўства.