Юбілейная выстава “Чароўная Марыя Калас”, прысвечаная 100-годдзю з дня нараджэння опернай спявачкі (1923–1977), праходзіць з 22 лістапада па 16 студзеня ў зале нотных і аўдыявізуальных дакументаў (пам. 305).
Марыя Калас – адна з самых уплывовых оперных спявачак ХХ стагоддзя. Яе голас быў такім незвычайным, што яго называлі боскім. Артыстка магла з лёгкасцю пераходзіць ад ніжняга піянісіма да магутнага фортэ, перадаваць самыя глыбокія пачуцці, гісторыю і эмоцыі персанажаў, якіх яна грала на сцэне.
Выстава, прысвечаная яе творчасці, будзе цікавая як прыхільнікам опернай музыкі, так і людзям, якія цікавяцца гісторыяй поспеху выбітных асоб. Матэрыялы, прадстаўленыя на выставе, дапамогуць больш даведацца пра станаўленне кар’еры опернай дзівы, пра тое, як яна дасягнула піка свайго поспеху, а затым паступова сышла са сцэнічнага жыцця, каб пасля аднавіць сваю славу і стаць культавай фігурай тэатральнай сцэны.
Шматлікія кнігі і артыкулы, фатаграфіі розных перыядаў жыцця спявачкі, калекцыя вінілавых пласцінак з запісамі яе знакамітых выступленняў – усё гэта дазволіць чытачам акунуцца ў займальны свет мастацтва і асабісты свет дзівоснай артысткі.
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 52.
Матэрыял пададзены аддзелам абслугоўвання спецыялізаванымі фондамі.
