З 14 красавіка па 21 мая ў зале абслугоўвання дакументамі міжнародных арганізацый Нацыянальнай бібліятэкі Беларусі (2 паверх, пакой 207g) адкрыта тэматычная кніжная выстаўка «Часоў злучальная нітка…», прысвечаная Міжнароднаму дню помнікаў і гістарычных месцаў, які штогод адзначаецца 18 красавіка.
Гэты дзень быў абвешчаны ў 1983 годзе Асамблеяй Міжнароднага савета па пытаннях аховы помнікаў і славутых месцаў (ICOMOS) і адобраны Генеральнай канферэнцыяй ЮНЕСКА.
Матэрыялы выстаўкі пазнаёмяць чытача з аб’ектамі, што з’яўляюцца культурнай і гістарычнай каштоўнасцю для чалавецтва ў розных рэгіёнах зямнога шара, а таксама дзейнасцю ICOMOS - міжнароднай арганізацыі, якая займаецца захаваннем, абаронай і паляпшэннем манументаў і гістарычных месцаў. На сённяшні дзень Спіс сусветнай спадчыны ЮНЕСКА налічвае больш за 800 прыродных і культурных аб’ектаў, складнікаў здабытак усяго чалавецтва.
Прапанаваная тэматычная выстаўка заклікана падкрэсліць неабходнасць бесперапыннай працы і супрацоўніцтва на мясцовым, рэгіянальным і глабальным узроўнях па вывучэнні і захаванні нерухомых культурных каштоўнасцей і манументальных помнікаў як адной з найважнейшых частак матэрыяльнай і духоўнай спадчыны кожнага народа, а таксама пазнаёміць з тымі мерапрыемствамі, якія ажыццяўляюць урады і органы ўлады розных краін для захавання помнікаў.
Экспазіцыя ўключае наступныя раздзелы:
- помнікі і гістарычныя месцы як частка культурнай спадчыны;
- міжнародныя дамовы і канвенцыі па ахове гісторыка-культурнай спадчыны;
- міжнароднае супрацоўніцтва па ахове аб’ектаў, якія адносяцца да гісторыі чалавецтва;
- вопыт асобных краін па кансервацыі і рэстаўрацыі помнікаў гісторыі і архітэктуры;
- захаванне помнікаў і гістарычных месцаў у Рэспубліцы Беларусь.
На выстаўцы – каля 60 дакументаў: кнігі, брашуры, перыядычныя выданні, мімеаграфаваныя матэрыялы. Вялікую частку складаюць дакументы міжнародных арганізацый (ААН, ЮНЕСКА, ICOMOS, Еўрапейскі Саюз, Савет Еўропы) на рускай, французскай і англійскай мовах.
Выстаўка прызначана для ўсіх, хто цікавіцца аховай, рэстаўрацыяй і захаваннем культурнай спадчыны, студэнтаў, выкладчыкаў, навуковых супрацоўнікаў і практычных работнікаў, дзяржаўных службоўцаў і членаў грамадскіх арганізацый.
