З 13 ліпеня па 5 жніўня 2009 года ў зале дакументаў міжнародных арганізацый Нацыянальнай бібліятэкі Беларусі (2-гі паверх, пам. 207g) адкрыта тэматычная кніжная выстаўка “Экалагічныя праблемы: позірк у будучыню”.

У ХХІ стагоддзі экалагічны стан планеты стаў глабальнай праблемай сусветнага маштабу, якую імкнуцца вырашыць вучоныя многіх краін свету. Чалавецтва сутыкнулася з шырокім спектрам экалагічных праблем лакальнага, рэгіянальнага і глабальнага ўзроўняў. Парушэнне азонавага слоя, знікненне лясоў, пагаршэнне стану атмасферы, урбанізацыя жыцця, радыеактыўныя і электрамагнітныя забруджванні, утварэнне смогу, вялікая колькасць неперапрацаваных адходаў, кліматычныя змены – усё гэта праблемы, якія патрабуюць неадкладных сумесных намаганняў розных міжнародных арганізацый, дзяржаў і сусветнай грамадскасці.За час свайго існавання, і асабліва ў ХХ стагоддзі, чалавецтва “ўхітрылася” знішчыць каля 70 працэнтаў усіх прыродных экалагічных сістэм на планеце. Як сцвярджаюць спецыялісты, праз 30–50 гадоў пачнецца незваротны працэс, які на мяжы ХХІ–ХХІІ стагоддзяў прывядзе да глабальнай экалагічнай катастрофы. Таму сёння асаблівую важнасць набывае вывучэнне і распаўсюджванне ведаў пра крытычны стан навакольнага асяроддзя з мэтай яго змены і паляпшэння.

Экалагічныя праблемы – гэта выклік розуму чалавека. Пазбегнуць іх немагчыма, іх можна толькі пераадолець. Прычым пераадолець намаганнямі кожнага чалавека і кожнай краіны ў цесным супрацоўніцтве дзеля вялікай мэты захавання магчымасці жыць на Зямлі. У ліку найважнейшых шляхоў вырашэння экалагічных праблем большасць даследчыкаў вылучае ўкараненне экалагічна чыстых, мала- і безадходных тэхналогій, павелічэнне колькасці ачыстных збудаванняў, рацыянальнае размяшчэнне вытворчасці і выкарыстанне прыродных рэсурсаў. Але, бясспрэчна, найважнейшай умовай вырашэння экалагічных праблем, якія паўсталі перад цывілізацыяй, неабходна прызнаць павышэнне экалагічнай культуры чалавека, сур’ёзную экалагічную адукацыю і выхаванне.

Прапанаваныя да ўвагі наведвальнікаў бібліятэкі матэрыялы выстаўкі пазнаёмяць з асноўнымі міжнароднымі прававымі актамі ў галіне захавання прыродных рэсурсаў, дакладамі пра стан навакольнага асяродзя ў свеце і ў асобных рэгіёнах, публікацыямі, прысвечанымі экалагічнай бяспецы і перспектывам устойлівага экалагічнага развіцця. Асаблівая ўвага нададзена аналізу экалагічнай сітуацыі ў нашай краіне. На выстаўцы прадстаўлены дакументы аб дзяржаўнай палітыцы Рэспублікі Беларусь у галіне рацыянальнага прыродакарыстання і аховы навакольнага асяроддзя, а таксама нацыянальныя справаздачы аб выкананні Рэспублікай Беларусь глабальных прыродаахоўных пагадненняў.

Асноўныя тэматычныя раздзелы выстаўкі:

сучасны стан навакольнага асяроддзя і праблема спусташэння прыродных рэсурсаў;
міжнародныя прававыя акты ў галіне захавання прыродных рэсурсаў;
аналіз актуальных экалагічных праблем і мер па іх пераадоленні;
палітыка Рэспублікі Беларусь у галіне прыродакарыстання і аховы навакольнага асяроддзя.

На выстаўцы прадстаўлена больш за 70 дакументаў на рускай і англійскай мовах: кнігі, перыядычныя выданні, мімеаграфаваныя матэрыялы ААН, брашуры, буклеты. Большую частку матэрыялаў экспазіцыі складаюць дакументы і публікацыі міжнародных арганізацый: ААН, ЮНЕСКА, Еўрапейскага cаюза, Савета Еўропы і інш.

Выстаўка зацікавіць вучоных, студэнтаў, спецыялістаў у галіне аховы навакольнага асяроддзя і ўсіх тых, хто неабыякавы да праблем экалогіі.

Карысныя спасылкі

Міжнародныя арганізацыі і экалагічныя праблемы

Арганізацыя Аб’яднаных Нацый