З 30 сакавіка па 27 красавіка ў зале дакументаў па мастацтве (пам. 306) праходзіць выстаўка “Геній любові, геній нянавісці”, прысвечаная 270-годдзю з дня нараджэння іспанскага мастака і гравёра Франсіска Гойі (1746–1828).
Адзін з першых і найбольш яркіх мастакоў выяўленчага мастацтва эпохі рамантызму, выдатны прадстаўнік іспанскай школы жывапісу, ён увасобіў у сваёй творчасці трагічны лёс і надзеі іспанскага народа, яго незлічоныя пакуты і бясконцую жыццёвую сілу. Рэальныя падзеі служылі для мастака крыніцай натхнення. Ён не проста адлюстроўваў навакольную рэчаіснасць, а выяўляў у сваіх творах асабістае стаўленне да таго, што адбывалася ў яго краіне.
Гойя стаў сапраўды вялікім наватарам. Ён рашуча адхіліў мастацкія прынцыпы, якія папярэднічалі яму і існавалі ў яго час, развеяў міф пра ідэал, агаліўшы суровую праўду жыцця без прыўкрас. У яго мастацтве непарыўна злучаны святло і цемра, дабро і зло, адчай і надзея, нянавісць і спагада, горкі песімізм і апантанае сцвярджэнне жыцця.
Спадчына творцы велізарная. Ён працаваў ва ўсіх жанрах: пісаў фрэскі (фрэска купала царквы Сан-Антоніа дэ ла Фларыда), гістарычныя кампазіцыі (“Расстрэл паўстанцаў у ноч на 3 мая 1808 года”), жанравыя сцэны (“Андалузская алея”, “Вяселле”), нацюрморты (“Тры лустачкі ласасіны”), стварыў некалькі вялікіх графічных цыклаў (“Капрычас”, “Бедствы вайны”).
Гойя пакінуў цікавую партрэтную галерэю сваіх сучаснікаў. У гэтых работах ён з незвычайнай чуласцю ўлавіў асноўныя рысы індывідуальнага чалавечага характару і псіхалогіі, выявіў іх асаблівасць, спароджаную эпохай (“Партрэт герцагіні Альбы”, “Партрэт графа Фларыдабланкі” і інш.).
На выстаўцы дэманструецца звыш 50 дакументаў – кнігі, альбомы, артыкулы, якія знаёмяць з біяграфіяй і этапамі творчага шляху Франсіска Гойі. Дапаўняюць экспазіцыю паштоўкі і рэпрадукцыі работ мастака.
Кантактны тэлефон: (8 017) 293 27 53.
 |
 |
 |
 |
 |
 |
 |
 |
 |
