З 23 сакавіка па 26 красавіка ў зале нотных і аўдыявізуальных дакументаў (пам. 305) праходзіць выстаўка “Герой эпічнай паэмы”, прысвечаная 100-годдзю з дня нараджэння кампазітара Германа Германавіча Галыніна (1922–1966).
Творчасць Германа Галыніна – адна з самых яскравых старонак пасляваеннай савецкай музыкі. Асноўныя яго творы напісаны ў кансерваторскія гады (1945–1950) у класах Шастаковіча і Мяскоўскага. За такі параўнальна невялікі перыяд кампазітар здолеў ахапіць самыя розныя жанры. Сярод іх – фартэпіянныя творы, камерныя сачыненні, песні, хоры, а таксама музыка да тэатральных пастановак. Вышэйшай жа кропкай яго творчасці сталі араторыя “Дзяўчына і Смерць” і “Эпічная паэма” для аркестра, ганараваная дзяржаўнай прэміяй.
Па ўспамінах сучаснікаў, Галынін валодаў сваёй асаблівай, дзіўнай, толькі яму ўласцівай манерай ігры. Сінтэзуючы ў сваёй творчасці стылістычныя прыёмы Шастаковіча, Пракоф’ева і іншых вядомых музыкаў, ён стварыў свой уласны, непаўторны стыль, які адрозніваецца дынамізмам, глыбокай лірычнасцю і тэатральнасцю вобразаў.
Падрабязней з біяграфіяй і прафесійнай дзейнасцю Германа Германавіча знаёміць экспазіцыя, дзе прадстаўлены не толькі творы кампазітара, але і шэраг музыказнаўчых прац і аналітычных артыкулаў, прысвечаных яго творчасці.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 52.
Матэрыял пададзены аддзелам абслугоўвання спецыялізаванымі фондамі.
