З 1 жніўня па 1 верасня ў зале нотных і аўдыядакументаў (пам. 305) дэманструецца выстаўка “І песні пройдуць скрозь часы”, прысвечаная 75-годдзю беларускага кампазітара Ігара Міхайлавіча Лучанка.
Імя народнага артыста Беларусі і СССР, заслужанага дзеяча мастацтваў Беларусі і Польшчы, лаўрэата прэміі Ленінскага камсамола Беларусі, прэміі Усесаюзнага Ленінскага камсамола, Дзяржаўнай прэміі Беларусі, Міжнароднай прэміі прафсаюзаў, кампазітара Ігара Лучанка шырока вядома ў розных краінах свету. Ён упісаў яскравую старонку ў гісторыю песеннай культуры XX ст., стварыў каларытныя і змястоўныя творы, якія адлюстравалі подых эпохі і імпульсіўнае жыццё сучаснікаў. Песні І. Лучанка ўвайшлі ў скарбніцу беларускай музычнай культуры, раскрыўшы новую грань у гэтым жанры музычнага мастацтва. Яго творы выконваюць артысты беларускай і расійскай эстрады, яны пастаянна гучаць як на радзіме кампазітара, так і далёка за межамі Беларусі.
Ігар Лучанок працуе ў розных жанрах – вакальна-сімфанічным, камерна-інструментальным, камерна-вакальным. Асноўная вобразная сфера яго творчасці лірыка-рамантычная. Музыцы ўласцівы меладычнасць і нацыянальная самабытнасць.
Творчасць І. Лучанка ахоплівае шырокае кола тэм, сярод якіх важнае месца займае тэма вайны. Экспазіцыя змяшчае такія вядомыя творы, як песні “Памяць сэрца”, “Майскі вальс”, “Хатынь”, “Пісьмо з 45-га”, “Курган Cлавы” і іншыя, вакальна-сімфанічную паэму “Вайна не патрэбна”, у якой гучыць тэма сацыяльнай і маральнай адказнасці чалавека за лёс усяго свету, услаўляюцца прыгажосць зямлі, жыцця.
На выстаўцы прадстаўлены творы лірыка-патрыятычнага зместу. – песні “Жураўлі на Палессе ляцяць”, “Мой родны кут”, “Спадчына”. Тэма Радзімы ў шырокім маральна-этычным сэнсе раскрыта ў песенным цыкле “Радзіма бацькоў” , які быў створаны на вершы беларускіх паэтаў В. Дуніна-Марцінкевіча, М. Танка і Н. Гілевіча. Добра вядомы і яго лірычныя песні – “Алеся”, “Вераніка”, “Ты ўспомні ўсё”, “Зачарованая мая” і інш.
Сярод дакументаў, што экспануюцца, – зборнікі песень, інструментальныя кампазіцыі “Гумарэска”, “Бярозка”, “Беларускія малюнкі”, паэма-легенда “Гусляр” і іншыя, а таксама гуказапісы з творамі кампазітара ў выкананні ансамбляў “Песняры” і “Сябры”.
Асобным раздзелам прадстаўлены кнігі і артыкулы з часопісаў, прысвечаныя жыццю і творчасці кампазітара.
Кантактны тэлефон: (8 017) 293 27 52.
 |
 |
 |
 |
 |
 |
