Нацыянальная бібліятэка Беларусі віншуе жыхароў і гасцей Мінска з Днём горада і запрашае наведаць святочную кніжную экспазіцыю “Мой Мінск, у сэрцы ты адзіны!”.
Мінск з’яўляецца палітычным, культурным і эканамічным цэнтрам Рэспублікі Беларусь з насельніцтвам каля двух мільёнаў жыхароў. Гэта сучасны еўрапейскі горад з развітай інфраструктурай, які мае свае афіцыйныя сімвалы: герб, сцяг і гімн.
Самабытны, прыгожы горад Мінск… Сёння ён выглядае маладым, хоць гэта адзін з самых старажытных гарадоў Еўропы. Першы ўспамін аб ім у старажытнарускім летапісе “Аповесць мінулых гадоў” адносіцца да 1067 года.
Пазнаёміцца з гісторыяй Мінска, яго галоўнымі вуліцамі і плошчамі, архітэктурнымі збудаваннямі, манументальнымі помнікамі, раскрыць невядомыя старонкі жыцця беларускай сталіцы дапаможа прапанаваная кніжная выстаўка, дзе прадстаўлена каля 150 выданняў.
Экспазіцыя складаецца з пяці частак: “Сталіца чароўнай краіны”, “Прамысловы і дзелавы цэнтр краіны”, “Духоўнае жыццё Мінска”, “Горад ведаў”, “Горад здароўя і высокіх сацыяльных стандартаў”.
У апошняй частцы экспазіцыі Мінск паўстае як спартыўная сталіца Беларусі. Вельмі значнай падзеяй ў жыцці горада і ўсёй краіны быў адзначаны 2014 год: з 9 па 25 мая тут праводзіўся 78-мы чэмпіянат свету па хакеі з шайбай. З гэтай нагоды ў беларускую сталіцу прыбыло шмат гасцей. Гасцініцы Мінска – іх 43 – прынялі каля 9 тысяч пастаяльцаў. У час чэмпіянату ў горадзе былі адкрыты дзве фан-зоны, якія размясціліся побач з галоўнымі лядовымі пляцоўкамі спартыўнага турніру – “Мінск-Арэнай” і “Чыжоўка-Арэнай”, і тры зоны гасціннасці ў трох кропках Мінска, дзе праходзілі забаўляльныя мерапрыемствы. Тут жа балельшчыкі маглі набыць сувеніры чэмпіянату, пакаштаваць традыцыйныя беларускія стравы, адпачыць.
Для саміх беларусаў хакей даўно перастаў быць проста гульнёй. Гэты папулярны зімні від спорту – сапраўдная культурная з’ява ў жыцці краіны. Таму асаблівая ўвага на выстаўцы надаецца выданням, прысвечаным хакею і гісторыі развіцця яго ў Беларусі.
Экспазіцыя размешчана на 2-м паверсе кальцавога калідора і будзе доўжыцца з 5 верасня па 8 кастрычніка 2014 г.
Кантактныя тэлефоны: (8 017) 293 28 86, 293 29 80.