З 28 красавіка па 20 мая ў зале нотных і аўдыядакументаў (пам. 305) арганізавана выстаўка “Музыка душы”, прысвечаная 90-годдзю з дня нараджэння паэта, празаіка, аўтара і выканаўцы сваіх песень, лаўрэата Дзяржаўнай прэміі СССР Булата Акуджавы.
Нараўне з Уладзімірам Высоцкім і Аляксандрам Галічам Булат Акуджава (1924–1997) з’яўляецца адным з яркіх прадстаўнікоў жанру рускай аўтарскай песні. Яго песні, выкананыя пад уласны акампанемент на гітары,вызначаюцца прастатой і натуральнасцю інтанацыі. Прасякнутыя тонкім лірызмам, яны нясуць слухачам простыя, але вечныя ісціны пра каханне, веру, сяброўства, надзею, братэрства і вернасць.
У творчай скарбонцы аўтара больш за 200 песень. Многія з іх пра ваенныя успаміны: "Бери шинель, пошли домой", "До свидания, мальчики", "Песня о пехоте", "Песенка о солдатских сапогах", "Маленький оркестрик", "Песенка весёлого солдата" і інш.
Усенародную славу Булату Акуджаве прынёс фільм Андрэя Смірнова “Беларускі вакзал”, у якім прагучала адна з лепшых песень паэта "Мы за ценой не постоим..." у выкананні Ніны Ургант. Папулярнымі сталі і іншыя песні да кінафільмаў “Ключ без права перадачы” (“Давайте восклицать”), "Белае сонца пустыні" ("Ваше благородие, госпожа удача", у сааўтарстве з Ісаакам Шварцам), "Саламяны капялюшык" ("Женюсь, женюсь") і інш.
На выстаўцы прадстаўлены нотныя выданні і аўдыядакументы з запісамі песень, вершаў і ўрыўкаў аповесцей у выкананні аўтара.
Наведвальнікі пазнаёмяцца са шматлікімі зборнікамі вершаў Булата Шалвавіча Акуджавы, з яго празаічнымі творамі: раманамі “Путешествие дилетантов” (1976–1978), "Свидание с Бонапартом" (1983), "Упраздненный театр" (1994), аповесцямі "Будь здоров, школяр!" (1961), "Похождения Шипова, или Старинный водевиль" (1971) і інш.
Дапаўняюць экспазіцыю кнігі і артыкулы з перыядычных выданняў пра жыццё і творчасць Булата Акуджавы.
Кантактны тэлефон: (8 017) 293 27 52.
 |
 |
 |
 |
 |
 |
