З 25 жніўня па 3 кастрычніка ў зале нотных і аўдыявізуальных дакументаў (пам. 305) праходзіць выстаўка “Нялёгкія дарогі да сябе”, прысвечаная 70-годдзю з дня нараджэння беларускага кампазітара У.А. Дамарацкага (1946–2000).
Творчасць Уладзіміра Аляксандравіча Дамарацкага – адна з недастаткова даследаваных старонак сучаснай беларускай музыкі. Гэты кампазітар часта апярэджваў калег у сваіх пошуках, знойдзенае ім выкарыстоўвалася іншымі аўтарамі, паступова становячыся традыцыяй. Пачаўшы з захаплення джазам, эстраднымі песнямі, ён пазней цалкам пераключыўся на сімфанічную і камерную музыку, цікава эксперыментаваў у галіне сінтэзу акадэмічных жанраў і джазавай або эстраднай музыкі.
Найбольш значныя творчыя дасягненні У. Дамарацкага выявіліся ў жанрах аркестравай і вакальна-інструментальнай музыкі. Ён аўтар дзвюх сімфоній, пяці канцэртаў, чатырох кантат. У кожным буйным сачыненні ён паўстае як кампазітар, які глыбока, канцэптуальна думае, выдатна валодае разнастайным арсеналам сучасных сродкаў выразнасці і найбагацейшымі музычнымі традыцыямі мінулага. Сучаснай музычнай мовай, веданнем магчымасцей музычных інструментаў адзначаны Канцэрт для валторны з аркестрам, фартэпіянныя саната і саната-карціна “Мазаіка”, саната для кларнета і фартэпіяна, п’есы для фартэпіяна, інструментальныя канцэрты.
Бліскучыя опусы для медных духавых інструментаў, створаныя У. Дамарацкім, сталі асобнай старонкай сучаснай беларускай музыкі: квінтэт, Канцэрт для валторны, два канцэрты для трубы, мініяцюры. У Другім канцэрце для трубы з аркестрам, адзначаным Дзяржаўнай прэміяй Рэспублікі Беларусь, уражвае трагічная глыбіня, не ўласцівая гэтаму жанру. У ім арганічна суіснуюць рамантычная ўзвышанасць і строгая рацыянальнасць, пошукі гармоніі быцця і мудрасць чалавека, які ведае цану жыцця.
Аўтар твораў у буйных інструментальных формах, У. Дамарацкі пісаў рамансы, песні, у тым ліку і дзіцячыя. Калі ў інструментальнай музыцы ён сур’ёзны, схільны да маналагічнасці, драматычнай экспрэсіі, то яго песні – іскрыстыя, меладычныя і па-дзіцячы з хітрынкай. Сучасныя танцавальныя рытмы, яркі меладызм, натуральнасць і нетрывіяльнасць інтанацыі, якая знешне здаецца простай, але разнастайна “расквечанай” знутры – усё гэта, бясспрэчна, надае прывабнасць музычным мініяцюрам У. Дамарацкага.
На выстаўцы прадстаўлены нотныя выданні твораў У. Дамарацкага, артыкулы з кніг і перыядычных выданняў. Нотныя рукапісы нявыдадзеных твораў, аўдыядыскі прадстаўлены сям’ёй кампазітара. Сярод іх мюзікл “Месяцовы дзень” – апошняе сачыненне У. Дамарацкага.
Дапаўняюць экспазіцыю фатаграфіі кампазітара і іншыя архіўныя дакументы.
Кантактны тэлефон: (8 017) 293 27 52.
 |
 |
 |
 |
 |
 |
 |
 |
 |
 |
 |
 |
