З 12 студзеня па 9 лютага ў зале нотных і аўдыявізуальных дакументаў (пам. 305) праходзіць выстаўка “Песня даўжынёю ў жыццё”, прысвечаная 220-годдзю з дня нараджэння аўстрыйскага кампазітара Франца Петэра Шуберта (1797–1828).
Адзін з заснавальнікаў рамантызму ў музыцы за сваё нядоўгае жыццё (усяго 31 год!) стварыў звыш 600 вакальных кампазіцый, 9 сімфоній, вялікую колькасць камернай і сольнай фартэпіяннай музыкі. Часам яго называлі “кампазітарам песень”, але ён стаў наватарам і ў сімфанічным жанры, стварыўшы прынцыпова новы тып сімфоніі, які пазней знайшоў свой працяг у творчасці іншых кампазітараў.
Найважнейшае месца ў яго творчасці займае песня для голасу з фартэпіяна. Адзін з найбуйнейшых меладыстаў, Шуберт рэфармаваў жанр песні, надзяліўшы яго глыбокім зместам, стварыў першыя высокамастацкія ўзоры вакальнага цыклу. Дзякуючы Шуберту песня ўпершыню стала роўнай па значэнні іншым жанрам. У яго песнях прадстаўлены вершы каля 100 паэтаў.
Аснову экспазіцыі склалі нотныя выданні вакальнай музыкі аўтара, сярод якіх – песенныя цыклы “Зімовы шлях”, “Прыгожая млынарка”, “Лебядзіная песня”, “Каханне млынара”, балады, песні ("Серэнада", "Ave Maria"), рамансы, ансамблі, творы для хору.
У ліку экспанатаў выстаўкі – шматлікія фартэпіянныя сачыненні: санаты, санаціны, фантазіі, варыяцыі, маршы, збор танцаў для фартэпіяна, сачыненні для фартэпіяна ў 4 рукі і інш. Прадстаўлены яго струнныя квартэты і іншыя камерна-інструментальныя творы, месы (B-dur, As-dur, G-dur, Es-dur), кантаты, уверцюры, сімфоніі (№ 5, № 7, № 8). Таксама наведвальнікі выстаўкі маюць магчымасць пазнаёміцца з творамі Ф. Шуберта ў пералажэнні для розных інструментаў (скрыпкі, віяланчэлі, мандаліны, домры, гітары, фагота, флейты, карнета, баяна і інш.).
Дапаўняюць экспазіцыю кнігі пра жыццё і творчасць кампазітара, аўдыязапісы яго твораў.
Усяго выстаўка налічвае каля 90 экспанатаў.
Кантактны тэлефон: (8 017) 293 27 52.
 |
 |
 |
 |
 |
 |
 |
 |
 |
 |
 |
 |
