З 6 па 30 лістапада ў зале беларускай літаратуры (пам. 205) праходзіць выстаўка “Шматгранны талент”, прысвечаная 70-годдзю беларускага пісьменніка Леаніда Зубарава.
Леанід Іосіфавіч вядомы чытачу як аўтар мастацка-дакументальных аповесцей, раманаў, паэм, вершаў, твораў для дзяцей і перакладаў. Свае творы ён піша на рускай, англійскай і беларускай мовах. Вырас пісьменнік у Мінску, а з 1990 года жыве ў ЗША.
Уладзімір Гніламёдаў – пісьменнік, доктар філалагічных навук – у сваіх разважаннях пра масавую літаратуру пісаў: “Пример довольно качественной массовой литературы для меня – книги белорусского литератора Л. Зуборева… «Змитрок Бядуля – белорусский еврей» (2006) и «Возлюбленные Максима Горького» (2008). …они не лишены привлекательности, даже сенсационности… Читаются с интересом”.
Наведвальнікі выстаўкі пазнаёмяцца з кнігамі, якія Л. Зубараў прысвяціў творчасці М. Багдановіча, “Максiм Багдановiч” (1989) і выданне на рускай мове “Максим Богданович” (2004). Менавіта з захаплення класікам беларускай літаратуры і пачалася літаратурная творчасць пісьменніка.
У кнігах выкарыстаны вядомыя, а таксама неапублікаваныя архіўныя дакументы, якія ўзнаўляюць старонкі жыцця сям’і Багдановічаў, іх сваяцкія і сяброўскія сувязі з Пешкавымі. Сярод экспанатаў – кніга “Крик буревестника” (1989) пра ўзаеміны М. Горкага і А. Багдановіча, нарысы пра гісторыю і культуру яўрэяў Беларусі “Белорусские евреи” (2003), мастацка-дакументальныя аповесці “Пророчество Казинца” (2008) і “Расплата” (2008), раман “Бомба для России” (2009) і інш.
Асобным блокам на выстаўцы прадстаўлены кнігі “Сказки и легенды” (2010), “Сказки” (2011), “Fairy Tales” (2011), у якіх сусветна вядомыя казкі ў прозе Л. Зубаравым перакладзены ў вершы.
Кантактны тэлефон: (8 017) 293 27 16.