Кніжна-ілюстрацыйная выстава “Трыумф стылю: мастацтва мадэрну” праходзіць з 19 красавіка па 20 мая ў зале дакументаў па мастацтве (пам. 306).
Да канца XIX стагоддзя еўрапейская культура ўпершыню пасля Рэнесансу назапасіла сілы для мастацкага ўзлёту. Вытанчаны эпізод еўрапейскай гісторыі, які атрымаў назву «Belle epoch» – “Цудоўная эпоха”, стаў вяршыняй росквіту мастацтваў і рамёстваў. Творы мастакоў, архітэктараў, дызайнераў, паэтаў і музыкаў гэтага перыяду служаць узорамі вытанчанага мастацкага густу. У Расіі гэты час стаў Сярэбраным векам рускай культуры.
Мадэрн, арт нуво, югендстыль, сэцэсіён – так называюць гэтую эпоху ў розных краінах. Вытанчаная эстэтыка, рафінаваны шык, элегантная пачуццёвасць, напышлівая плаўнасць ліній і мудрагелістыя арнаменты – вось што такое стыль мадэрн, які ахапіў усе бакі чалавечага жыцця: ад архітэктуры да прадметаў побыту. Майстры новага стылю ператваралі звычайныя рэчы інтэр’еру ва ўнікальныя творы мастацтва, а творы мастацтва станавіліся элементам паўсядзённага жыцця. Мастакі чэрпалі натхненне ў жывой прыродзе, дэкарыруючы свае працы ўзорамі са стылізаванымі малюнкамі кветак на павойных сцяблінках, вінаграднай лазы, матылькоў, стракоз, паўлінавых пёраў.
На выставе стыль мадэрн паўстае ў шырокім тэматычным дыяпазоне і разнастайнасці жанраў. Экспазіцыя дазваляе адчуць вечную прыгажосць “Цудоўнай эпохі” і віртуознасць выканання шэдэўраў гэтага часу. Увазе наведвальнікаў прапанаваны маляўнічыя выданні, у якіх можна ўбачыць панараму развіцця стылю і захапіцца працамі майстроў найвышэйшага ўзроўню.
Яркім увасабленнем мадэрну ў жывапісе сталі работы мастакоў Альфонса Мухі і Густава Клімта, рэпрадукцыі якіх займаюць заўважнае месца ў экспазіцыі. Каб апісаць стыль мадэрн, часта проста кажуць “стыль Мухі”. Вытанчаная паэзія форм і ліній, кветкавая феерыя арнаментаў, далікатная чароўнасць жаночых вобразаў, прадстаўленых на выставе, з’яўляюцца ўвасабленнем усяго самага прыгожага, загадкавага, пачуццёвага. Не менш раскошныя жаночыя вобразы Густава Клімта. Камплект з постарамі аўтарытэтнага нямецкага выдавецтва “Taschen” дазволіць больш уважліва разгледзець і палюбавацца самай знакамітай карцінай Клімта “Пацалунак” і іншымі творамі майстра.
Частка экспазіцыі адведзена альбомам і рэпрадукцыям прадстаўнікоў рускага мадэрну. Леў Бакст, Міхаіл Урубель, Іван Білібін, Канстанцін Сомаў і іншыя мастакі сфарміравалі ў Расіі новы стыль з яго характэрнымі рысамі, але адначасова і сам новы стыль паўплываў на творчасць многіх майстроў таго часу. Сярод кніг пра мадэрн у рускай архітэктуры важнае месца займае праца цудоўнага мастацтвазнаўцы Марыі Нашчокінай “Московский модерн”.
Экспазіцыю дапаўняюць ілюстрацыйныя матэрыялы аб сусветным мадэрне, які ярка ўвасобіўся ў шкле і дзіўных вітражах, у элегантным строі інтэр’ераў, у невялікіх прадметах побыту і многае іншае. Альбом буйнога фармату У.Р. Лісоўскага “Стиль модерн в архитектуре” дэманструе на сваіх старонках напышлівыя крацістыя балконы дамоў і асабнякоў свету. Побач прадстаўлены альбомы вялікага іспанскага архітэктара Антоніа Гаўдзі. Наведвальнікаў выставы несумненна прыцягне раскошнае выданне “История моды” з калекцыямі Інстытута касцюма Кіёта, дзе тэма прыгажосці і жаноцкасці ўвасобілася ў пышных строях “Цудоўнай эпохі”.
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 53.
Матэрыял пададзены аддзелам абслугоўвання спецыялізаванымі фондамі.