Вялікай Перамозе Нацыянальная бібліятэка Беларусі прысвячае тэматычную кніжную выстаўку “Вялікі дзякуй за пераможны май!”, якая праходзіць з 19 красавіка па 15 мая.
У экспазіцыі прадстаўлена звыш 150 кніг, якія выдадзены за апошнія тры гады і апавядаюць пра гераізм, мужнасць і стойкасць савецкіх людзей у гады Вялікай Айчынай вайны. Гэта і апавяданні пра ўнікальныя чалавечыя лёсы, невядомыя ці малавядомыя ваенныя падзеі, інтэрнацыянальны характар подзвігаў, якія здзяйсняліся ў імя Перамогі. Галоўны сэнс твораў – свяшчэнная памяць пра тых, хто заваяваў права на несмяротнасць самай дарагой цаной – цаной жыцця.
Праходзяць дзесяцігоддзі, змяняюцца пакаленні, але Перамога савецкага народа ў Вялікай Айчынай вайне 1941–1945 гг. навечна застанецца ў гераічным летапісе Беларусі як сімвал нацыянальнай гордасці, воінскай славы і доблесці. Менавіта беларусы першымі прынялі на сябе вераломны ўдар фашысцкіх захопнікаў 22 чэрвеня 1941 г. Тысячы нашых суайчыннікаў змагаліся ў гэтай вайне. У бязлітаснай барацьбе з ворагам яны паказвалі прыклады мужнасці, стойкасці і гераізму, выконвалі адказныя задачы па абароне Айчыны.
Перамога вяршылася не толькі ў буйных змаганнях, але і ў баях за кожную вышыню, кожны населены пункт, кожны горад, кожную вёску.
На месцах кровапралітных баёў каля гарадоў і населеных пунктаў сёння стаяць мемарыялы, помнікі і абеліскі, да іх зноў і зноў прыходзяць людзі старэйшага і маладога пакаленняў, каб пакланіцца несмяротнаму подзвігу землякоў. Памяць пра герояў увекавечана ў назвах вуліц, плошчаў, сквераў.
Наш свяшчэнны абавязак – захоўваць гэтую гераічную спадчыну, баявыя традыцыі беларускага народа, перадаваць новаму пакаленню самае святое пачуццё – любоў да Радзімы, суверэннай і незалежнай Беларусі.
Кантактны тэлефон: (8 017) 293 28 86.