З 5 па 28 лютага ў зале выяўленчых і відэадакументаў (пом. 307) дэманструецца выстаўка “Зачараваны сцэнай”, прысвечаная 80-годдзю вядучага дзеяча тэатральнай сцэны Беларусі Расціслава Іванавіча Янкоўскага. .
Расціслаў Янкоўскі – народны артыст Беларусі (1967), народны артыст СССР (1978), лаўрэат Дзяржаўнай прэміі Рэспублікі Беларусь (1998), лаўрэат прэміі Саюзнай дзяржавы ў галіне літаратуры і мастацтва (2006). З 1957 г. і да гэтага часу – акцёр Нацыянальнага акадэмічнага драматычнага тэатра імя М. Горкага. З 1993 г. – нязменны прэзідэнт міжнароднага кінафестывалю “Лістапад”.
За час сваёй творчай дзейнасці Расціслаў Іванавіч стаў адным з найбольш вядомых дзеячаў тэатральнай культуры Беларусі. Яго творчасць вылучаецца псіхалагічнай глыбінёй, эмацыянальнай напоўненасцю, вострым драматызмам. Акцёр cыграў больш за 60 галоўных ролей у тэатры, каля 50 у кіно і тэлефільмах, якія прынеслі яму ўсенародную вядомасць і любоў гледачоў. Сярод іх ролі, якія ўвайшлі ў скарбніцу нацыянальнага тэатральнага мастацтва, – Макар Нагульнаў (“Паднятая цаліна”), Антоній (“Антоній і Клеапатра”), Макбет (“Макбет”), Ягор Булычоў ("Ягор Булычоў і іншыя”), Вяршынін (“Тры сястры”), Барон (“На дне”) і інш.
У экспазіцыі прадстаўлены каля 100 дакументаў, прысвечаных творчай дзейнасці акцёра, – альбомаў, кніг, артыкулаў і фатаграфій.
Кніжна-ілюстрацыйная выстаўка разлічана на ўсе катэгорыі чытачоў, якія цікавяцца гісторыяй беларускага тэатра, а таксама жыццём і творчасцю Расціслава Іванавіча Янкоўскага.
Кантактны тэлефон: 293-27-58.
 |
 |
 |
 |
 |
 |
