З 21 мая па 11 ліпеня ў зале выяўленчых і відэадакументаў (пам. 307) праходзіць выстаўка "Заснавальнік нямецкага Адраджэння" да 540-годдзя з дня нараджэння нямецкага жывапісца i графіка, тэарэтыка мастацтва Альбрэхта Дзюрэра (1471–1528).
Багацце фантазіі, глыбіня творчай думкі, майстэрства мастака найбольш поўна выявіліся ў галіне гравюры, таму ёй па праве належыць вядучая роля ў яго творчасці. Ён упершыню падняў гравюру да ўзроўню высокага мастацтва, да якога раней адносілі толькі жывапіс і скульптуру. Графіка мастака незвычайна багатая і разнастайная і па тэхніках (ксілаграфія, гравюра на медзі, сухая іголка, афорт), і па сюжэтах (міфалагічныя, біблейскія, сучасныя), і па жанрах (ілюстрацыя, партрэт, бытавая тэма). Вялікую вядомасць майстру прынесла серыя з 15 гравюр на дрэве "Апакаліпсіс" (1498), а таксама два вялікія графічныя цыклы, прысвечаныя пакутам Хрыста "Вялікія пакуты" (1498–1510), "Малыя пакуты" (1507–1513). Вяршыня графічнага стылю Дзюрэра – майстэрскія гравюры 1513–1514 гг. ("Коннік, смерць і д’ябал", "Меланхолія", "Св. Іеранім").
Маляўнічыя творы мастака па сваім узроўні не менш значныя: "Пакланенне вешчуноў" (1504), "Марыя з дзіцём" (1512), "Адам і Ева" (1507). Апошняй вялікай жывапіснай работай Дзюрэра была "Чатыры апосталы" (1526) – запавет мастака, у якім выразіўся вобраз чалавека, які ўвасобіў веліч яго духоўнай сілы.
Незвычайная мастацкасць, шырыня інтарэсаў, рознабаковасць ведаў дазваляюць паставіць Альбрэхта Дзюрэра ў адзін рад з такімі ўслаўленымі майстрамі Адраджэння, як Леанарда да Вінчы, Мікеланджэла, Рафаэль.
На выстаўцы прадстаўлена звыш 100 дакументаў. Гэта кнігі, часопісы, электронныя рэсурсы, паштоўкі, эстампы і рэпрадукцыі, прысвечаныя заснавальніку нямецкага Адраджэння.
Экспазіцыя разлічана на ўсе катэгорыі чытачоў, якія цікавяцца творчасцю мастака.
Кантактны тэлефон: 293-27-58.