З 25 жніўня па 29 верасня ў зале беларускай літаратуры (пам. 205) праходзіць выстаўка “Зазірнуць у таямніцы лёсу: з гісторыі беларускіх родаў”, на якой прадстаўлены творы, прысвечаныя генеалогіі і геральдыцы Беларусі.
Вывучэнне гісторыі – частка культуры, без якой мы не можам самаўсвядоміць сябе, адказаць на фундаментальнае пытанне – хто мы такія. У сучасны момант цікавасць да беларускай сімволікі, геральдыкі і генеалогіі надзвычай вялікая. Прычым гэты інтарэс праяўляецца двоесна: з аднаго боку – цікавасць да гісторыі краіны, свайго народа ўвогуле; з другога – да лёсу сваёй сям’і, роду. Пра гэта сведчыць значнае павышэнне попыту на гістарычную і геральдычна-генеалагічную літаратуру ў бібліятэцы.
На тэматычнай кніжнай выстаўцы прадстаўлены творы вядомых беларускіх даследчыкаў А. Нарбута, А. Статкевіча-Чабаганава, А. Шаланды, С. Рыбчонка, А. Залівакі і іншых, якія займаюцца вывучэннем радаводаў высакародных саслоўяў краіны.
Экспазіцыя пазнаёміць з выданнямі серыі “Летопись белорусской шляхты”, заснаванай А. Статкевічам-Чабаганавым, якая прысвечана старажытным беларускім родам і змяшчае цікавыя факты з гісторыі прадстаўнікоў беларускай шляхты, копіі гістарычных дакументаў і фотаздымкі. Каштоўным для наведвальнікаў стане і шматтомнае выданне «Гербоўнік беларускай шляхты», выдадзенае Нацыянальным гістарычным архівам Беларусі. Сярод матэрыялаў – выданні дарэвалюцыйнага часу, аўтарамі якіх з’яўляюцца А. Банецкі, Б. Папроцкі, К. Нясецкі, А. Каяловіч і інш.
Цікавым будзе раздзел, прысвечаны гісторыі тытулаваных родаў, дзе размешчана інфармацыя пра Радзівілаў, Тышкевічаў, Ваньковічаў, Валовічаў. Так, род Радзівілаў, адзін з найбольш славутых родаў еўрапейскай арыстакратыі, які бярэ пачатак у старажытнасці, і да сённяшняга дня не спыніў свайго існавання.
Завяршаюць выстаўку кнігі, напісаныя людзьмі, зацікаўленымі вывучэннем гісторыі сваёй сям’і і стварэннем радаводу.
Экспазіцыя змяшчае каля 180 дакументаў.
Кантактны тэлефон: 8 (017) 293 27 16.