З 5 сакавіка па 6 красавіка ў аддзеле абслугоўвання афіцыйнымі дакументамі (пам. 207) адкрыта тэматычная кніжная выстаўка “Жанчыны ў сучасным свеце”, прысвечаная Міжнароднаму жаночаму дню.

Рашэнне аб штогадовым святкаванні гэтага дня было прынята Генеральнай Асамблеяй ААН (рэзалюцыя A/RES/32/142) у 1977 годзе. З таго часу Міжнародны жаночы дзень штогод святкуецца 8 сакавіка як дзень міжнароднай салідарнасці жанчын у барацьбе за эканамічнае, сацыяльнае і палітычнае раўнапраўе. Ён праводзіцца ва ўсім свеце на мясцовым і дзяржаўным узроўнях. У некаторых краінах гэты дзень з’яўляецца нацыянальным святам.

Дасягненне роўнасці паміж мужчынамі і жанчынамі і пашырэнне праў і магчымасцей жанчын з’яўляецца абавязковай умовай стварэння больш здаровых, адукаваных, мірных і квітнеючых грамадстваў. Калі жанчыны надзелены ўсімі правамі і прымаюць актыўны ўдзел у грамадскім жыцці, выйграе ўсё грамадства. Толькі такім чынам можна паспяхова рашыць велізарныя задачы, якія стаяць перад нашым светам, – ад урэгулявання канфліктаў і мірабудаўніцтва да барацьбы са СНІДам і дасягнення ўсіх іншых мэт у галіне развіцця, сфармуляваных у Дэкларацыі тысячагоддзя. Таму і сёння, і ў будучым ні адно правільнае рашэнне найбольш сур’ёзных сацыяльных, эканамічных і палітычных праблем грамадства не можа быць знойдзена без усебаковага ўдзелу жанчын свету і без ажыццяўлення ўсіх іх праў і магчымасцей.

Сёлета адзначаецца 15-я гадавіна прыняцця Пекінскай дэкларацыіі Платформы дзеянняў на IV Сусветнай канферэнцыі па становішчы жанчын у Пекіне ў 1995 годзе.

Пятнаццаць гадоў таму на IV Сусветнай канферэнцыі па становішчы жанчын урады абавязаліся дабівацца раўнапраўя, развіцця і міру ў інтарэсах усіх жанчын планеты. Эпахальная Пекінская дэкларацыя аказала глыбокае і рознабаковае ўздзеянне. Яна паслужыла дапаможнікам для выпрацоўкі палітыкі і з’явілася стымулам для краін к прыняццю новых нацыянальных законаў.

Сёння жанчыны ўсяго свету з надзеяй і з усё большай упэўненасцю глядзяць у будучыню. Іх намаганні ў барацьбе за роўнасць, справядлівасць, мір і развіццё не аказаліся марнымі. На сённяшнім этапе прыкладаў прагрэсу – мноства, у значнай ступені ён дасягнуты дзякуючы рашучым намаганням міжнародных арганізацый і грамадства ў цэлым. Зараз большасць дзяўчынак атрымліваюць адукацыю, асабліва на пачатковым узроўні, стаў больш верагодным удзел жанчын у кіраванні бізнесам, у дзяржаўным кіраванні, а таксама у працэсе сацыяльнага развіцця. Расце колькасць краін, якія прымаюць законы, накіраваныя на ахову палавога і рэпрадуктыўнага здароўя і падтрымку гендэрнай роўнасці.

Тым не менш, зрабіць яшчэ трэба нямала. Усё гэтак жа празмерна высокі паказчык мацярынскай смяротнасці, вельмі мала жанчын у свеце маюць доступ да паслуг па планаванню сям’і, востра паўстае праблема насілля жанчын і гендэрная дыскрымінацыя.

Жанчыны заўсёды адыгрывалі і адыгрываюць важную ролю ў Беларусі. Яны складаюць 53,3 % ад агульнай колькасці насельніцтва. Дзяржаўная палітыка ў Рэспубліцы Беларусь адносна жанчын накіравана на рэалізацыю іх палітычных, сацыяльных, эканамічных і культурных праў. Прымаюцца меры па рэфармаванні заканадаўства ў інтарэсах жанчын, распрацоўваюцца і ажыццяўляюцца сацыяльна-эканамічныя меры па паляпшэнні становішча жанчын, умацаванні і падтрымцы сям’і, забяспечваецца кантроль над захаваннем праў і гарантый для жанчын. Пазітыўнае ўздзеянне на павышэнне сацыяльнага статусу жанчын аказвае таксама развіццё жаночага руху, пашырэнне сацыяльнага партнёрства жаночых грамадскіх арганізацый з урадавымі структурамі і актывізацыя гендэрных даследаванняў.

Выстаўка ўключае наступныя тэматычныя раздзелы:

Жанчыны свету ў гістарычнай рэтраспектыве;
Шматгранная роля жанчын у грамадстве (жанчыны ў палітыцы, эканоміцы, сям’і, культуры);
Міжнародныя прававыя дакументы, накіраваныя на паляпшэнне становішча жанчын;
Здароўе і адукацыя жанчын;
Барацьба за ліквідацыю насілля адносна жанчын;
Гендэрныя праблемы роўнасці палоў;
Становішча жанчын у Рэспубліцы Беларусь.

У экспазіцыі прадстаўлена больш за 100 публікацый ААН, ЮНЕСКА, Савета Еўропы, Еўрапейскага саюза і Сусветнага банка на рускай, англійскай, французскай і нямецкай мовах: кнігі, перыядычныя выданні, брашуры, буклеты, мімеаграфаваныя матэрыялы ААН.

Выстаўка будзе цікавая выкладчыкам сацыяльна-палітычных дысцыплін, студэнтам, правазнаўцам, гісторыкам, сацыёлагам, кіраўнікам, прадстаўнікам дзяржаўных органаў і няўрадавых арганізацый, а таксама ўсім, хто цікавіцца пытаннямі гендэрнай ідэалогіі і сацыялогіі.

Карысныя спасылкі

Дакументы

Дзейнасць ААН

Арганізацыі сістэмы ААН

Канферэнцыі і мерапрыемствы

Міжнародны дзень барацьбы за ліквідацыю насілля адносна жанчын (25 лістапада)
Сесія Камісіі па становішчы жанчын (Пекін+10) (28 лютага – 11 сакавіка 2005 года)
XXIII Спецыяльная сесія Генеральнай Асамблеі (Пекін+5) (5–9 чэрвеня 2000 года)
Сусветная канферэнцыя па становішчы жанчын (4–15 верасня 1995 года)

Жанчыны ў сучасным свеце

Інфармацыйныя рэсурсы

Паслугі