З 1 па 30 лістапада ў зале беларускай літаратуры (пам. 205) праходзіць выстаўка “Жыццё, выказанае словам”, прысвечаная 80-годдзю з дня нараджэння беларускага пісьменніка, перакладчыка, кінадраматурга В.У. Адамчыка (1933–2001).
Лаўрэат Дзяржаўнай прэміі БССР імя Якуба Коласа (1988) і Літаратурнай прэміі імя Івана Мележа (1980), Вячаслаў Уладзіміравіч Адамчык імкнуўся вызначыць для сябе тое адзінае, што для мастака можа скласці мэту і сэнс, – спасціжэнне душы народа, праўды гістарычнага лёсу і жыцця. Значную колькасць сваіх твораў ён напісаў, абапіраючыся на асабістыя ўспаміны і перажыванні.
Экспазіцыю адкрываюць творы В. Адамчыка, сярод якіх – асобныя выданні раманаў, зборы твораў і публікацыі ў перыёдыцы за розныя гады (апавяданні, эсэ, дзённікі).
Найбольш значным творчым дасягненнем пісьменніка з’яўляецца тэтралогія, прысвечаная Заходняй Беларусі (уключае раманы “Чужая бацькаўшчына” (1978), “Год нулявы” (1983), “І скажа той, хто народзіцца” (1987), “Голас крыві брата твайго” (1990)). Іх аб’ядноўвае дэталёвае апісанне штодзённага вясковага побыту і прыродных з’яў, сакавітая народная мова персанажаў, імкненне да сацыяльна-псіхалагічнага даследавання чалавека. Не менш ярка праявіўся талент Вячаслава Уладзіміравіча пры напісанні апавяданняў, якія называюць “вершамі ў прозе”.
Варта адзначыць дзейнасць пісьменніка ў якасці сцэнарыста дакументальных фільмаў “Іван Мележ” (1977), “Валянцін Таўлай” (1978), “Дзядзька Якуб” (1989).
У раздзеле “Пачуццё стылю” можна пазнаёміцца як з перакладамі самога Вячаслава Адамчыка (зборнік балгарскіх народных казак “Незвычайны асілак” (1961), паасобныя творы М. Прышвіна, Ю. Казакова, С. Залыгіна і інш.), так і са шматлікімі варыяцыямі твораў пісьменніка на рускай, украінскай, англійскай, нямецкай, французскай і іншых мовах.
Асобна прадстаўлены кнігі, артыкулы і энцыклапедычныя матэрыялы, прысвечаныя жыццю і літаратурнай спадчыне В.У. Адамчыка.
Усяго на выстаўцы сабрана каля 130 дакументаў.
Кантактны тэлефон: (8 017) 293 27 16.