З 1 па 30 лістапада ў зале беларускай літаратуры (пам. 205) праходзіць выстаўка “Адданасць роднаму слову і літаратуры”, прысвечаная 80-годдзю беларускага літаратуразнаўца, педагога, метадыста, арганізатара навукі В.Я. Ляшук.
Асноўныя кірункі навуковай творчасці Веры Якаўлеўны Ляшук – літаратурнае краязнаўства Брэстчыны, даследаванне твораў беларускай дзіцячай літаратуры, пытанняў методыкі выкладання беларускай і рускай моў у школе, праблем педагогікі вышэйшай школы.
Працы даследчыцы вызначаюцца практычнай накіраванасцю, актуальнасцю і змястоўнасцю. У іх Вера Якаўлеўна паўстае глыбокім аналітыкам, даследчыкам гістарычных літаратурных з’яў, чалавекам энцыклапедычных ведаў, метадыстам з арыгінальнай і практычна выверанай канцэпцыяй.
У раздзеле “Талент педагога і метадыста” прадстаўлены аўтарскія працы: “Краеведение как средство повышения эффективности учебно-воспитательной работы по литературе в школах Белоруссии: автореферат на соискание ученой степени кандидата педагогических наук” (1974), “Краязнаўчы матэрыял на ўроках літаратуры” (1980), “Урокі пазакласнага чытання” (1984), “Вывучэнне эпічных твораў” (1987 ), “Лабараторныя заняткі па методыцы выкладання беларускай літаратуры” (1988), “Літаратурнае краязнаўства ў школе” (1991), “Вывучэнне беларускай літаратуры ў школе: гісторыка-метадычны нарыс” (1994).
Акрамя тэматычных выданняў, тут змешчаны дапаможнікі для настаўніка, прысвечаныя творчасці асобных пісьменнікаў: І. Мележа, Я. Коласа, А. Міцкевіча, Я. Брыля, М. Багдановіча, К. Крапівы і інш. Некаторыя з іх выдадзены ў серыі “Бібліятэка настаўніка”.
Экспазіцыю працягваюць кнігі, якія былі падрыхтаваны Верай Якаўлеўнай у суаўтарстве: “Матэрыялы для пазакласнай работы па беларускай літаратуры” (1971), “Міжпрадметныя сувязі ў выкладанні беларускай мовы і літаратуры” (1992), “Методыка выкладання беларускай літаратуры” (1999, 2002), “Літаратурная Берасцейшчына” (2008) і інш.
На выстаўцы можна пазнаёміцца з выданнямі, у якіх В. Ляшук, выступае як аўтар-складальнік, укладальнік і рэдактар.
Раздзел “З любоўю і годнасцю” ўключае шматлікія аўтарскія публікацыі, якія змешчаны ў часопісах і калектыўных зборніках.
Матэрыялы раздзела “З верай па жыцці” больш падрабязна пазнаёмяць з жыццём і творчасцю нястомнага працаўніка юбіляра. Свае артыкулы ёй прысвяцілі І. Саламевіч, Т. Махнач, Т. Федзюкова, Н. Левічава, Г. Ішчанка, Г. Снітко і інш.
Выстаўка багата ілюстравана фотаздымкамі.
Кантактны тэлефон: (8 017) 293 27 16.