C 25 лютага па 14 сакавіка ў зале выяўленчых і відэадакументаў (пам. 307) праходзіць выстаўка «Жывапісец шчасця», прысвечаная 170-годдзю з дня нараджэння французскага жывапісца, графіка, скульптара, аднаго з вядучых майстроў імпрэсіянізму Агюста Рэнуара (1841–1919).
Агюст Рэнуар – адзін з самых жыццялюбівых мастакоў у гісторыі мастацтва. Яго звалі жывапісцам шчасця, майстрам гармоніі, паэтам дзяцей і жанчын. На карцінах Рэнуара адлюстраваны радасны, поўны ціхамірнасці свет, дзе няма месца суму і пакуце.
Значнае месца ў творчасці мастака займае партрэтны жывапіс. Для яго чалавек – гэта самае цудоўнае ў агульнай гармоніі свету. Рэнуар стварыў свой тып жаночай прыгажосці, які адрозніваецца жаноцкасцю і пяшчотай. «Дзяўчына з веерам», «Партрэт актрысы Жанны Самары», «Аголеная» – гэтыя светлыя, лёгкія, празрыстыя па колеры і малюнку партрэты сталі гімнам пачуццёвай і прыроднай прыгажосці. З асаблівым зачараваннем на палотнах мастака намаляваны дзіцячыя твары. Адчуваннем бесклапотнай жыццярадаснасці напоўнены цудоўныя вобразы на карцінах «Дзяўчынка з лейкай», «Дзяўчынка з абручом», «Дзяўчынка з пужкай» і інш.
Перыядам найвышэйшых дасягненняў у творчым жыцці Рэнуара былі 1870-я гады. У гэты час былі створаны такія шэдэўры, як «Ложа», «Арэлі», «Баль у Мулен дэ ла Галет». Жывапісец, аптыміст па натуры, праз усю творчасць пранёс любоў да адлюстравання свята паўсядзённага жыцця. Майстар заўсёды заставаўся верным свету прыгажосці, радасці і шчасця. Мастацтва Агюста Рэнуара – гэта заўсёды маладосць і ніколі завяданне.
На выстаўцы прадстаўлена звыш 100 матэрыялаў. Гэта альбомы, кнігі, артыкулы, календары, рэпрадукцыі, паштоўкі і плакаты.
Кантактны тэлефон: 293-27-58.