2 снежня а 17-й гадзіне ў галерэі “Панарама” Нацыянальнай бібліятэкі Беларусі адбудзецца ўрачыстае адкрыццё выстаўкі “12+”.
Арганізатары мерапрыемства – Нацыянальная бібліятэка Беларусі і Міжнародная гільдыя жывапісцаў.
Выстаўка сучаснага беларускага жывапісу “12+” экспануе работы 12 майстроў сярэдняга пакалення, вядомых і ў нашай краіне, і па-за яе межамі. Асноўная мэта экспазіцыі – паказаць разнастайнасць манер і стыляў гэтага віду мастацтва.
На выстаўцы дэманструюцца розныя жанры жывапісу: пейзажы (Ягор Батальёнак, Аляксандр Грышкевіч), асацыятыўныя палотны (Аляксандр Забаўчык), міфалагічныя карціны (Фёдар Ястраб, Уладзімір Кожух). У дыяпазоне ад прыёмаў сфумата да адкрытай дэкаратыўнасці выяўляюцца асаблівасці творчасці Сяргея Давыдовіча, Васіля Касцючэнкі, Уладзіміра Савіча. Пачуццёвасць, экспрэсіўнасць выразнай манеры аб’ядноўваюць работы Алега Скавародкі і Дзмітрыя Сурыновіча.
Паказаныя на выстаўцы творчыя пошукі 12 жывапісцаў даюць магчымасць убачыць і ацаніць тыя працэсы, якія сёння прасочваюцца ў беларускім жывапісе.
У верасні 2010 г. у рамках Дзён Беларусі ў Аб’яднаных Арабскіх Эміратах экспазіцыя “12+” была прадстаўлена ў г. Абу-Дабі і атрымала станоўчыя водгукі гледачоў і крытыкаў.
Выстаўка будзе доўжыцца да 15 студзеня 2011 г. у галерэі “Панарама” (22-гі паверх, закрытая аглядная пляцоўка). З 3 снежня ўваход на выстаўку платны і адпавядае кошту наведвання агляднай пляцоўкі.
Тэлефоны для даведак: 293-27-67, 293-28-23
