З 16 па 18 жніўня праходзіла VII Кіеўская міжнародная кніжная выстаўка-кірмаш, прымеркаваная да святкавання 20-й гадавіны Незалежнасці Украіны.
У рабоце выстаўкі ўзяла ўдзел намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці Л.Г. Кірухіна. У рамках выстаўкі адбылася цырымонія перадачы Нацыянальнай бібліятэцы Украіны імя У.І. Вярнадскага 134 лепшых кніг выдавецтваў Беларусі. Гэта ўжо трэцяя акцыя па перадачы кніг, якая рэалізуецца ў рамках праекта “Беларусь сёння”.
Падчас сустрэчы Л.Г. Кірухінай з кіраўніцтвам Нацыянальнай бібліятэкі Украіны імя У.І. Вярнадскага быў абмеркаваны шырокі круг пытанняў, якія датычацца актывізацыі сумеснай навукова-даследчай работы. Была дасягнута дамоўленасць аб працягу праекта па стварэнні электроннай бібліятэкі роду Храптовічаў, а таксама ўзаемнай перадачы лічбавых копій дакументаў па ўкраіністыцы і беларусістыцы.
Дасягнута важная дамоўленасць аб тым, што ўкраінскія калегі алічбуюць рарытэтныя выданні Ф. Скарыны, якія захоўваюцца ў іх фондах, і перададуць Нацыянальнай бібліятэцы Беларусі электронныя копіі дадзеных выданняў. Акрамя таго, у знак плённага і шматгадовага супрацоўніцтва першы нумар часопіса “Бібліотечний вісник”, які выдаецца ва Украіне, у 2012 годзе будзе поўнасцю прысвечаны Нацыянальнай бібліятэцы Беларусі, што можа служыць добрым прыкладам сумеснай выдавецкай дзейнасці.
Вынікам наведвання Кіеўскага кніжнага кірмаша стала перадача Нацыянальнай бібліятэкай Украіны імя У.І. Вярнадскага 135 кніг украінскіх выдавецтваў Нацыянальнай бібліятэцы Беларусі.
Чытайце таксама: