З 27 ліпеня па 7 жніўня адбылося міжнароднае велападарожжа па краінах Прыбалтыкі з удзелам бібліятэкараў і прыхільнікаў бібліятэк, адной з удзельніц якога была супрацоўніца Нацыянальнай бібліятэкі Беларусі Настасся Жарская.
“Бібліятэка як ровар. Калі не будзе рухацца наперад, паваліцца”
Кацярына Шкляр (удзельніца)
Мэтай вандроўкі Cycling for libraries з’яўляецца стварэнне нефармальнага асяродку для прафесійнай камунікацыі, а таксама прыцягненне ўвагі грамадскасці да бібліятэчных праблем. Галоўнымі яе арганізатарамі выступілі фінскія бібліятэкары на чале з Юкам Пенаненам і Масе Оялам пры падтрымцы Міністэрства культуры і адукацыі Фінляндыі.
Сярод ста бібліятэкараў-раварыстаў з 20 краін свету, што ўдзельнічалі ў велапрабегу, былі і прадстаўнікі Беларусі: Настасся Жарская з Нацыянальнай бібліятэкі Беларусі і Марына Важнік з Беларускай сельскагаспадарчай бібліятэкі імя І.С. Лупіновіча.
Маршрут 11-дзённага велападарожжа прайшоў з Вільні ў Талін праз гарады і вёскі, замкі і сядзібы, лясы і палі, нацыянальныя паркі і, вядома ж, праз бібліятэкі. Пад час гэтага “самага працяглага прафесійнага бібліятэчнага мерапрыемства ў свеце” ўдзельнікі праехалі звыш 600 км, наведалі каля 20 самых розных бібліятэк і агледзелі шэраг культурна-гістарычных і прыродных помнікаў. А таксама паўдзельнічалі ў разнастайных семінарах, культурных мерапрыемствах, нефармальных сустрэчах і дыскусіях, што прайшлі пад знакам бібліятэчнай справы ды інфармацыйных тэхналогій.
На сваім шляху вандроўцы ўвесь час адчувалі значнасць гэтага мерапрыемства для грамадскасці. У гарадах і мястэчках Літвы, Латвіі і Эстоніі іх віталі мэры і віцэ-мэры, прадстаўнікі бібліятэчных супольнасцей і вядомыя дзеячы культуры. Паўсюль праходзілі сустрэчы з журналістамі буйнейшых мясцовых газет і тэлеканалаў. Нават міністр культуры Латвіі Жанэта Яўнземэ-Грэндэ падтрымала велааматараў, далучыўшыся на сваім ровары да велашпацыру па Рызе.
Падрабязныя нататкі пра бібліятэчнае велападарожжа
Відэасправаздачы пра “Cycling for Libraries 2012” на сайце фінскага бібліятэчнага ТВ-каналаФатаграфіі Настассі Жарскай, а таксама Андрэя Леуціна і Пану Энтрэсэ