19 красавіка ў 19.00 Нацыянальная бібліятэка Беларусі адчыніла свае дзверы для ўсіх жадаючых далучыцца да штогадовай культурнай акцыі ў падтрымку кнігі і чытання – "Бiблiяноч-2019"!
Калі вы ўжо ў нашай бібліятэцы і хочаце па-сапраўднаму адчуць жыццё ва ўсіх яго фарбах, значыць, сёння вы зрабілі правільны выбар! А тыя, хто яшчэ не тут, спяшайцеся! У вас яшчэ ёсць час да 23.00.
Адкрылі "Бiблiяноч" студэнткі БДУКМ – Навука, Публіцыстыка, Лірыка, Эпас, Драма і іншыя прадстаўніцы ўсіх відаў дакументаў, якія захоўваюцца ў фондах "алмаза ведаў".
Гасцей прывітала першы намеснік дырэктара Нацыянальнай бібліятэкі Беларусі Алена Далгаполава, пажадаўшы ўсім пазітыўнага вечара і цудоўнага настрою.
Першымі пачалі працу гульнявыя пляцоўкі "Мазгабойня", "Ход канём", "Жыццё-гульня", "Геній фінансаў", "Горад засынае - прачынаецца мафія", пазнавальная пляцоўка "У лабірынце традыцый", музычная – "Вінілавы рэлакс", дзіцячая – "Дарослых.net", дабрачынная пляцоўка – "Абярніцеся". Стартавалі трэнінг-лекцыя "Псіхалогія канфлікту" і падарожжа-квэст "У Краіну кніжных скарбаў".
Нагадваем, што ўвесь вечар працуюць бонусныя пляцоўкі. Вас чакаюць пацешныя галаваломкі, цікавыя прыборы і механізмы ў музеі навукі "Элемента", на выставе "Fantasy Land" – казачныя экспанаты, якія свецяцца ў цемры, а таксама незвычайная галерэя "Панарама" і цудоўны вiд Мінска з 73 метраў на агляднай пляцоўцы бібліятэкі.
Увага! Наведаць бясплатна бонусныя пляцоўкі можна па прад'яўленні фішкі, атрыманай за актыўны ўдзел у конкурсах Бiблiяночы.
Правядзі гэты вечар з намі!
Матэрыял прадастаўлены аддзелам сувязей з грамадскасцю.
