У гэтым годзе Нацыянальная бібліятэка Беларусі падрыхтавала і выпусціла даведнік “Библиотеки Беларуси”.
Выхад у свет гэтага трохтомнага выдання з’яўляецца падзеяй у бібліятэчнай супольнасці не толькі нашай краіны, але і ўсяго свету. Унікальнасць выдання заключаецца ў тым, што ў ім упершыню ў сукупнасці падаюцца звесткі пра бібліятэкі ўсіх міністэрстваў і ведамстваў нашай дзяржавы: публічныя бібліятэкі ўсіх гарадоў і раёнаў Беларусі, бібліятэкі заканадаўчых, прадстаўнічых і выканаўчых органаў улады, розных прадпрыемстваў, арганізацый і ўстаноў, галіновых навукова-даследчых інстытутаў, вышэйшых, сярэдніх спецыяльных і прафесійна-тэхнічных навучальных устаноў, вучэбна-педагагічных комплексаў, школ, ліцэяў, гімназій, воінскіх частак, грамадскіх аб’яднанняў і саюзаў, рэлігійных канфесій, турмаў, калоній для непаўналетніх і г.д.
Пра кожную бібліятэку дадзены асноўныя звесткі: поўная назва, паштовы адрас, графік работы, кантактны тэлефон, e-mail, адрас cайта.
Для найбольш зручнага і хуткага пошуку неабходнай інфармацыі складальнікамі распрацаваны дадатковыя ўказальнікі: геаграфічны, які дазваляе хутка знайсці звесткі пра бібліятэкі пэўнага населенага пункта; указальнік па відах бібліятэк, з дапамогай якога можна без цяжкасцей атрымаць звесткі пра бібліятэкі канкрэтнага віду ў кожнай вобласці; указальнік асоб, імёны якіх прысвоены бібліятэкам.
Выданне будзе цікавым і карысным для ўсіх, хто карыстаецца паслугамі бібліятэк сёння, асобам, зацікаўленым у супрацоўніцтве з бібліятэкамі, а таксама самім бібліятэчным работнікам.
З поўным пералікам выданняў, якія выпускаюцца Нацыянальнай бібліятэкай Беларусі, можна азнаёміцца на інтэрнэт-партале бібліятэкі ў раздзелах "Электронныя выданні бібліятэкі" і "Друкаваныя выданні бібліятэкі".
Выдавецкую прадукцыю можна набыць па падпісцы або купіць у кіёску, размешчаным у будынку бібліятэкі на 1-м паверсе каля галоўнага ўвахода.
Па пытаннях набыцця выданняў па падпісцы звяртацца ў выдавецкі аддзел па тэлефонах: (+375 17) 293-28-22; 293-28-13; e-mail: edit@nlb.by.
