1 ліпеня, напярэдадні Дня Рэспублікі, Нацыянальную бібліятэку Беларусі наведалі хопчыкі і дзяўчаткі са шматдзетных і малазабяспечаных сем’яў сельскай школы вёскі Брожа Бабруйскага раёна Магілёўскай вобласці. Для іх была праведзена экскурсія “Помнім боль і страты твае, Беларусь...” у рамках цыкла “Славутыя імёны Бацькаўшчыны”.
Дзеці пазнаёміліся з архітэктурай, мастацкім афармленнем бібліятэкі, сістэмай заказу, дастаўкі і выдачы дакументаў.
Частка экскурсіі прайшла ў форме інтэрактыўных заняткаў, падчас якіх юныя экскурсанты даведаліся пра жыццё і творчасць П. Панчанкі, А. Куляшова, М. Танка, убачылі ўнікальныя дакументы з фондаў Нацыянальнай бібліятэкі Беларусі, звязаныя з тэмай Вялікай Айчыннай вайны, прынялі ўдзел у віктарыне. Для хлопчыкаў і дзяўчынак дэманстраваўся мультыплікацыйны фільм "Лыжка для салдата" па матывах апавядання Янкі Маўра "Драўляная лыжка".
У канцы экскурсіі госці падняліся на аглядную пляцоўку і палюбаваліся Мінскам з вышыні птушынага палёту.
Запрашаем усіх, хто цікавіцца беларускай літаратурай і гісторыяй, на экскурсіі з цыклу “Славутыя імёны Бацькаўшчыны” па творчасці знакамітых беларусаў: Францыска Скарыны, Янкі Купалы, Якуба Коласа, Максіма Багдановіча, Кандрата Крапівы, Міхася Зарэцкага, Янкі Маўра, Уладзіміра Караткевіча, Васіля Быкава, Марка Шагала, Івана Шамякіна.
Заяўкі прымаюцца з 10.00 да 18.00 кожны дзень, акрамя нядзелі.
Тэлефоны для запісу: (8 017) 293 29 66, 293 28 53.
Матэрыял пададзены экскурсійна-метадычным аддзелам.