19 чэрвеня 2009 года ў Нацыянальнай бібліятэцы Беларусі адбыўся практычны семінар “Інтэрнэт-рэклама: вынікі і перспектывы. Рэкламныя магчымасці Яндэксу”.
Дадзенае мерапрыемства стала першым для Беларусі рэгіянальным семінарам кампаніі “Яндэкс”. У семінары прынялі ўдзел вядучыя супрацоўнікі расійскай кампаніі “Яндэкс”. Мерапрыемства праводзілася з мэтай прадстаўлення беларускай аўдыторыі інтэрнэт-карыстальнікаў найноўшых магчымасцей праграмных прадуктаў, распрацаваных спецыялістамі Яндэксу.
Удзельнікі семінара выступілі з дакладамі на тэму анлайнавай рэкламы: яе класіфікацыі, аўдыторыі, структуры рынку. Расійскія і беларусія спецыялісты разважалі аб правілах стварэння рэкламнага паведамлення і мастацтве падбору лексікі для кантэкстнай рэкламы, аб алгарытме правядзення рэкламнай кампаніі, магчымасцях медыйнай і рэгіянальнай рэкламы на Яндэксе і інш.
Семінар сабраў больш за 600 слухачоў – прадстаўнікоў розных беларускіх кампаній, маркетолагаў шэрага дзяржаўных і прыватных арганізацый, супрацоўнікаў рэкламных агенцтваў, прадстаўнікоў веб-студый, распаўсюджвальнікаў рэкламы, навучэнцаў і студэнтаў навучальных устаноў Беларусі, а таксама ўсіх тых, каму цікава было даведцца пра магчымасці Яндэксу і сучасныя анлайнавыя рэкламныя тэхналогіі.