Нацыянальная бібліятэка Беларусі ўзяла ўдзел у XXI Усерасійскай навукова-практычнай канферэнцыі і выставе “Карпаратыўныя бібліятэчныя сістэмы: тэхналогіі і інавацыі” (КарФор), якая адбылася 19–26 чэрвеня ў Санкт-Пецярбургу – Сартавале (Расійская Федэрацыя).
Ва ўмовах глакалізацыі навукі і адукацыі, іх лічбавай трансфармацыі бібліятэкі шукаюць новыя фарматы абслугоўвання навукова-адукацыйнай дзейнасці, наладжваюць новыя сувязі, выяўляюць новыя крыніцы інфармацыі, больш актыўна выкарыстоўваюць рэсурсы адкрытага доступу. Удзельнікі канферэнцыі падзяліліся сваім бачаннем існуючых тэндэнцый, назапашаным вопытам і лепшымі практыкамі.
Надзвычайную цікавасць выклікала ўзнятая на канферэнцыі тэма прымянення штучнага інтэлекту ў рабоце бібліятэк.
У ліку практычных інавацыйных праектаў, накіраваных на ўніфікацыю паказчыкаў выкарыстання электронных інфармацыйных рэсурсаў, быў прадстаўлены сэрвіс АРБИКОН “SuperStat”.
Важнай падзеяй для бібліятэк стала анансаванне новага расійскага дыскаверы-сэрвісу “Неопоиск”, які забяспечвае інтэлектуальны пошук замежных і айчынных інфармацыйных рэсурсаў у рэжыме адзінага пошукавага акна.
У мерапрыемстве ўзялі ўдзел 532 спецыялісты (вочна – 232 і завочна – 300), 143 кіраўнікі. Нацыянальную бібліятэку Беларусі (НББ) прадставіла начальнік інфармацыйнага цэнтра Ала Шарамецьева, якая распавяла аб найбуйнейшых карпаратыўных праектах беларускіх бібліятэк: зводным электронным каталогу і віртуальнай чытальнай зале НББ. Даклад быў узнагароджаны дыпломам XXI Усерасійскай навукова-практычнай канферэнцыі “Карпаратыўныя бібліятэчныя сістэмы: тэхналогіі і інавацыі” ў намінацыі “За паспяховы дэбют”.
Матэрыял пададзены начальнікам інфармацыйнага цэнтра НББ.
