5 ліпеня ў атрыуме 2-га паверха адбылося адкрыццё беларуска-расійскага выставачнага праекта “Прыгажосць і традыцыі народнага касцюма”, прымеркаванага да Года міру і стварэння ў Рэспубліцы Беларусь і Года педагога і настаўніка ў Расійскай Федэрацыі.
У аснове праекта – фарміраванне духоўна-маральнага і інтэлектуальнага развіцця асобы шляхам вывучэння культурнай спадчыны праз стваральны творчы працэс.
На выставе прадстаўлены 6 арыгінальных традыцыйных беларускіх касцюмаў Кобрынскага, Маларыцкага, Калінкавіцкага, Старадарожскага, Мсціслаўскага, Лідскага рэгіёнаў і 30 народных касцюмаў, створаных выхаванцамі дзіцячых дамоў. Гэта вобразы Хакаскага, Мардоўскага, Чувашскага, Усцюжскага, Саратаўскага, Архангельскага, Варонежскага, Марыйскага і іншых рэгіёнаў Расіі, а таксама два ўзоры беларускага і армянскага народных касцюмаў. Кожны экспанат суправаджаецца падрабязным апісаннем індывідуальнасці і самабытнасці строяў – ад выгляду тканіны да статуснага прызначэння.
Таксама ў экспазіцыю ўвайшлі дэталі народнага касцюма, традыцыйныя ўпрыгажэнні і аксесуары, калекцыя з 26 лялек з тканіны ў традыцыйным касцюме. Дапоўнілі выставу беларускія выцінанкі і маляўнічыя тэматычныя выданні з фонду Нацыянальнай бібліятэкі Беларусі.
У адкрыцці ўзялі ўдзел намеснік генеральнага дырэктара Нацыянальнай бібліятэкі Беларусі Віктар Пшыбытка, выканаўчы дырэктар міжнароднага фестывалю мастацтваў “Славянскі базар у Віцебску” Андрэй Карпаў, старшы навуковы супрацоўнік Цэнтра даследаванняў беларускай культуры, мовы і літаратуры Нацыянальнай акадэміі навук Беларусі Марыя Віннікава і дырэктар дабрачыннага фонду “Миссия” Маргарыта Бурак.
Падчас выступлення Маргарыта Бурак перадала сімвалічны падарунак, матрошку, распісаную дзецьмі Сыктыўкарскага дзіцячага дома, прадстаўніку Дабрачыннага фонду імя Аляксея Талая ў знак прызнання заслуг у дабрачыннай дзейнасці.
Культура народа – гэта асобны гістарычны свет са сваімі спецыфічнымі рысамі і адметнасцямі. Асаблівую актуальнасць набывае далучэнне дзяцей у працэс адраджэння культуры. Менавіта яны павінны ведаць сваю родную мову, традыцыі, рамёствы, каб потым перадаць вопыт сваім дзецям.
Арганізатарамі праекта выступілі Нацыянальная бібліятэка Беларусі, Дабрачынны фонд “Миссия” (Масква, Расійская Федэрацыя), Цэнтр культуры “Віцебск”, Музей старажытнабеларускай культуры Нацыянальнай акадэміі навук Беларусі.
Запрашаем пагрузіцца ў свет народнага касцюма да 14 студзеня 2024 года.
Дата заканчэння працы экспазіцыі можа быць зменена.
Уваход – па чытацкім білеце або білеце сацыякультурнага цэнтра.
Час работы выстаўкі адпавядае рэжыму работы бібліятэкі.
Тэлефон для даведак: (8 017) 368 37 37.
Матэрыял пададзены аддзелам сувязей з грамадскасцю.
