19 кастрычніка ў Мінскім дзяржаўным мастацкім каледжы імя А.К. Глебава адбылося ўрачыстае адкрыццё навукова-практычнай канферэнцыі “Спадчына Францыска Скарыны”.
Арганізатары мерапрыемства – Міністэрства культуры Рэспублікі Беларусь, Мінскі дзяржаўны мастацкі каледж імя А.К. Глебава, Нацыянальная камісія Рэспублікі Беларусь па справах ЮНЕСКА і Нацыянальная бібліятэка Беларусі.
Прывітальнае слова ўдзельнікам даслаў міністр культуры Рэспублікі Беларусь Юрый Бондар. У адкрыцці канферэнцыі прынялі ўдзел дырэктар каледжа Аляксандр Шантаровіч і іншыя.
На пленарным пасяджэнні з дакладамі выступілі Алесь Суша, навуковы кіраўнік канферэнцыі, намеснік дырэктара Нацыянальнай бібліятэкі Беларусь па навуковай і выдавецкай дзейнасці, кандыдат культуралогіі (“Кніжная спадчына Францыска Скарыны ў кантэксце развіцця мастацкай культуры Беларусі”), Таццяна Сапега, загадчык сектара навукова-праектнай работы (“Папулярызацыя кніжнай спадчыны Францыска Скарыны для дзяцей і моладзі ў рамках праекта «У госці да кніг» Нацыянальнай бібліятэкі Беларусі”) і Кацярына Яршова, выкладчык МДМК імя Глебава (“А.К. Глебаў. Гісторыя стварэння помніка”).
На працягу двух дзён будуць працаваць секцыі "Жыццё і творчасць Францыска Скарыны" (кіраўнік секцыі Галіна Кірэева, загадчыца навукова-даследчага аддзела кнігазнаўства Нацыянальнай бібліятэкі Беларусі), "Літаратурная спадчына Францыска Скарыны" (кіраўнік Таццяна Карнілава, галоўны бібліёграф навукова-даследчага аддзела кнігазнаўства Нацыянальнай бібліятэкі Беларусі), "Мастацкая спадчына Францыска Скарыны", "70-годдзе МДМК імя Глебава" і іншыя.