25 верасня ў бібліятэцы ў межах выставачнага праекта “Беларусь і Біблія” адбылася лекцыя доктара Бруса Андэрсана “Берасцейская Біблія і Рэфармацыя ў ВКЛ”.
Мерапрыемства арганізавана Нацыянальнай бібліятэкай Беларусі, Групай даследавання рукапісаў (ЗША) і Беларускім дзяржаўным універсітэтам.
Брус Андэрсан – доктар (PhD) Оксфардскага цэнтра місійных даследаванняў, даследчык раннемадэрнай палітычнай думкі.
Берасцейская Біблія – помнік беларускага кнігадрукавання, выдадзены на сродкі Мікалая Радзівіла Чорнага ў 1563 годзе, самая вялікая і багата аформленая беларуская друкаваная кніга XVI стагоддзя. Гэта другі (пасля каталіцкай Бібліі Леапаліта) поўны пераклад Святога Пісання на польскую літаратурную мову XVI стагоддзя. Дакладчык падкрэсліў, што Берасцейская Біблія з’яўляецца першым поўным перакладам з моў арыгіналу – іўрыта і грэчаскай.
Брус Андэрсан прадставіў Берасцейскую Біблію ў гістарычным кантэксце і ў параўнанні з іншымі тагачаснымі выданнямі Бібліі розных канфесій. Лектар азначыў, што кніга адпавядала заклікам эпохі Адраджэння і была накіравана на канцэпцыю асабістага чытання і разважання над Святым Пісаннем.
У дыскусіі прынялі ўдзел вучоныя Інстытута гісторыі Нацыянальнай акадэміі навук Беларусі, гістарычнага факультэта Беларускага дзяржаўнага ўніверсітэта, Беларускага дзяржаўнага ўніверсітэта культуры і мастацтваў і іншыя.
