20 снежня ў галерэі “Лабірынт” адбылася інтэрактыўная лекцыя-канцэрт “На Раство Хрыстова анёл прыляцеў” з цыкла “Нацыянальная музычная спадчына Беларусі”.
Напярэдадні Каляд і навагодніх святаў душа, у чаканні цуду, імкнецца напоўніцца адчуваннем цяпла, спакою і ўтульнасці. Музычная капэла Цэнтра даследаванняў беларускай культуры, мовы і літаратуры НАН Беларусі і мастацкі кіраўнік праекта Галіна Паўлаўна Цмыг у гэты снежны вечар падзяліліся святочным настроем з усімі жадаючымі.
У праграме канцэрта-лекцыі прагучалі творы беларускіх кампазітараў каляднай тэматыкі ў выкананні харавога і інструментальнага калектыву. Слухачам выпала магчымасць памузіцыраваць разам з выканаўцамі: ім было прапанавана развучыць песні і канты, прысвечаныя цудоўнаму зімоваму святу, а таксама пазнаёміцца з нацыянальным беларускім інструментам – колавай лірай.
Напрыканцы вечара, аб’ядноўваючы ўсіх прысутных, прагучала навагодняя песня “Jingle Bells” на беларускай мове.
Запрашаем жадаючых на наступны канцэрт “Зайграй жа мне, дударочку, а я патанцую”, на якім будзе прадстаўлена музыка беларускай народнай інструментальнай традыцыі ў гучанні колавай ліры, жалейкі, дуды, акарыны і многіх іншых інструментаў. Сустрэча адбудзецца 26.01.2023 (чацвер) у 18.30.
Уваход вольны (пры наяўнасці чытацкага білета або пропуску сацыякультурнага цэнтра).
Тэлефон для даведак: (8 017) 293 27 52.
Матэрыял пададзены аддзелам абслугоўвання спецыялізаванымі фондамі.
