28 чэрвеня ў рамках Адзінага дня інфармавання адбылася сустрэча міністра культуры Рэспублікі Беларусь Анатоля Мечыслававіча Маркевіча з калектывам Нацыянальнай бібліятэкі Беларусі.
Мерапрыемства прайшло напярэдадні галоўнага дзяржаўнага свята беларускага народа – Дня Незалежнасці Рэспублікі Беларусь (Дня Рэспублікі).
У мерапрыемстве таксама ўзялі ўдзел прадстаўнікі Міністэрства культуры: начальнік упраўлення па ахове гісторыка-культурнай спадчыны Наталля Дзмітрыеўна Хвір, начальнік упраўлення культуры і народнай творчасці Ірына Уладзіміраўна Карповіч, начальнік аддзела ўстаноў адукацыі Марына Браняславаўна Юркевіч.
Тэмы сустрэчы – роля гісторыка-культурнай спадчыны Беларусі ў фарміраванні грамадзянскасці і патрыятызму, патрыятычнае выхаванне грамадзян як прыярытэт дзяржаўнай палітыкі ў Рэспубліцы Беларусь.
У размове з супрацоўнікамі бібліятэкі Анатоль Мечыслававіч падзякаваў калектыву за працу, адзначыўшы, што ў аснове згуртаванасці грамадства ляжаць патрыятызм і любоў да Радзімы, патрыятызм выяўляецца не ў словах і лозунгах, а ў жыццёвай пазіцыі чалавека, яго сэрцы. Міністр культуры падкрэсліў, што ў Год народнага адзінства неабходна ўмацоўваць беларускую дзяржаўнасць, узмацняць значнасць беларускай культуры ў патрыятычным выхаванні.
У дзень памяці першага народнага паэта Беларусі Янкі Купалы Нацыянальная бібліятэка падрыхтавала тэматычную выставу-прагляд. У экспазіцыі – прыжыццёвыя выданні, рэдкія кнігі з уладальніцкімі надпісамі з асабістай бібліятэкі Івана Луцэвіча, здымак Янкі Купалы з аўтографам вядомага беларускага фатографа Яна Булгака, зборнікі твораў паэта, сучасныя выданні, ілюстраваныя лепшымі мастакамі краіны, факсімільныя і мініяцюрныя выданні.
Матэрыял пададзены аддзелам сувязей з грамадскасцю.
