15–16 верасня адбудзецца IX Міжнародны кангрэс “Бібліятэка як феномен культуры”, прысвечаны 100-годдзю Нацыянальнай бібліятэкі Беларусі. Юбілей бібліятэкі мае сусветнае значэнне і ўнесены ў каляндар памятных дат ЮНЕСКА.
Тэма 2022 года – “Лічбавая трансфармацыя бібліятэк: пераемнасць і вектар развіцця”.
Арганізатарамі мерапрыемства выступаюць Міністэрства культуры Рэспублікі Беларусь, некамерцыйнае партнёрства “Бібліятэчная асамблея Еўразіі”, Міждзяржаўны фонд гуманітарнага супрацоўніцтва дзяржаў – удзельніц СНД, Нацыянальная бібліятэка Беларусі.
Урачыстае адкрыццё адбудзецца а 10-й гадзіне 15 верасня ў Нацыянальнай бібліятэцы Беларусі. У праграме: пленарнае і секцыйныя пасяджэнні, выстава выдавецкай прадукцыі.
У працы возьмуць удзел больш за 350 дэлегатаў з Беларусі і краін блізкага замежжа – Расіі, Азербайджана, Казахстана, Кыргызстана, Таджыкістана, Узбекістана. Гэта кіраўнікі і аўтарытэтныя спецыялісты найбуйнейшых бібліятэк, архіваў, музеяў, выдавецтваў, вядучых навукова-даследчых арганізацый і адукацыйных устаноў, вытворцы праграмнага забеспячэння, тэхнічных сродкаў, інфармацыйнай прадукцыі і прамысловага абсталявання для бібліятэк, прадстаўнікі дзяржаўных структур і грамадскіх арганізацый.
Кангрэс стане эфектыўнай пляцоўкай для прафесійных зносін, інфармацыйнага абмену бібліятэчнай супольнасці па пытаннях гісторыі бібліятэчнай справы, нарматыўнага прававога рэгулявання бібліятэчнай дзейнасці, навуковых даследаванняў у рэалізацыі дзяржаўнай бібліятэчнай палітыкі, лічбавізацыі дзейнасці бібліятэк, інавацыйных падыходаў да арганізацыі фондаў, сучасных напрамкаў у абслугоўванні карыстальнікаў, прафесійных кампетэнцый спецыялістаў бібліятэк.
У рамках кангрэса пройдуць мерапрыемствы: XXVI Агульны сход некамерцыйнага партнёрства “Бібліятэчная асамблея Еўразіі”, узнагароджанне бібліятэк – пераможцаў XXX Рэспубліканскага конкурсу “Бібліятэка – асяродак нацыянальнай культуры”, дыскусійная пляцоўка “Электронныя рэсурсы: адкрыты дыялог выдаўцоў і бібліятэкараў”.
Вынікам стане выпрацоўка рэзалюцыі, якая зафіксуе прынятыя рашэнні па далейшым развіцці бібліятэчнай галіны, рэалізацыі мэт і задач дзяржаўнай культурнай палітыкі.
Больш інфармацыі і рэгістрацыя ўдзельнікаў – на сайце канферэнцыі.
Чытайце таксама: