У сакавіку для дзяцей і іх бацькоў у рамках праекта музея кнігі “Клуб кніжных прафесараў” адбыліся заняткі “Францыск Скарына”, прысвечаныя жыццю і дзейнасці беларускага першадрукара.
Францыск Скарына – адзін з самых яркіх і вядомых творцаў беларускай культуры. Ён першым з усходніх славян выдаў кнігу друкарскім спосабам і адкрыў новую эпоху ў культурным развіцці нашага народа.
Талент Скарыны праявіўся шматгранна – беларускі і ўсходнеславянскі першадрукар, перакладчык, пісьменнік, філосаф, лекар… Набываючы грунтоўныя веды, ён прайшоў шлях маральнага і інтэлектуальнага самаўдасканалення.
Удзельнікі заняткаў па карце “прайшлі” шляхам Скарыны: “пабывалі” ў Полацку, дзе нарадзіўся і атрымаў пачатковую адукацыю асветнік, “вучыліся” ў Вільні, Кракаве і Падуі, “друкавалі” ў Празе і Вільні.
На занятках дзеткі выкарыстоўвалі тамы факсімільнага выдання “Кніжная спадчына Францыска Скарыны”. Яны чыталі ўрыўкі з прадмоў і пасляслоўяў, разглядалі гравюры, у выніку чаго асэнсавана запаміналі факты.
Творчыя заданні дазволілі праявіць індывідуальныя здольнасці, замацаваць тэарэтычныя веды і крэатыўна паглядзець на аб’ект пазнання.