26 чэрвеня ў Нацыянальнай бібліятэцы Беларусі падведзены вынікі IV Рэспубліканскага конкурсу “Бібліятэка – цэнтр духоўнай асветы і выхавання”.
Для ўдзелу ў конкурсе было накіравана 43 работы ад публічных бібліятэк Міністэрства культуры Рэспублікі Беларусь, бібліятэк устаноў адукацыі Міністэрства адукацыі Рэспублікі Беларусь і іншых ведамстваў. На суд кампетэнтнага журы рэспубліканскага этапа конкурсу былі прадастаўлены лепшыя работы.
У ходзе пасяджэння рэспублiканскага журы былі вызначаныя пераможцы ў чатырох намінацыях: “Духоўна-маральнае выхаванне дзяцей і моладзі”, “Гісторыя Праваслаўя роднага краю”, “Сям'я – спадчынніца маральных і духоўных каштоўнасцей”, “Патрыятычнае выхаванне на праваслаўных традыцыях”. У выніку было намінавана і вылучана на заахвочванне 29 конкурсных работ.
У склад журы ўвайшлі: епіскап Барысаўскі і Мар'інагорскі Веньямін (старшыня журы), дырэктар Нацыянальнай бібліятэкі Беларусі Р. Матульскі (намеснік старшыні журы), галоўны бібліятэкар навукова-даследчага аддзела бібліятэказнаўства Нацыянальнай бібліятэкі Беларусі В. Рынкевіч (сакратар журы), галоўны спецыяліст упраўлення культуры і народнай творчасці Міністэрства культуры Рэспублікі Беларусь С. Бацян, галоўны спецыяліст упраўлення агульнай і сярэдняй адукацыі Міністэрства адукацыі Рэспублікі Беларусь І. Булаўкіна, сакратар Выдавецкага савета Беларускай праваслаўнай царквы Т. Самайлюк, загадчыца Цэнтральнай бібліятэкі Беларускага экзархата С. Вінаградава, член Каардынацыйнага савета па бібліятэчнай дзейнасці пры Сінадальным аддзеле рэлігійнай адукацыі і катэхізацыі БПЦ Т. Квасова.
Пасля зацвярджэння пратакола пасяджэння журы Мітрапалітам Мінскім і Заслаўскім Паўлам, Патрыяршым Экзархам усяе Беларусі, інфармацыя пра пераможцаў будзе апублікавана на афіцыйных сайтах Беларускай праваслаўнай царквы, Нацыянальнай бібліятэкі Беларусі, Сінадальнага аддзела рэлігійнай адукацыі і катэхізацыі БПЦ і сайце “Праваслаўныя бібліятэкі Беларусі”.