Пайшла з жыцця ветэран Нацыянальнай бібліятэкі Беларусі, высокакваліфікаваны бібліёграф Галіна Іванаўна Антонава (03.031948 – 08.07.2021).
Галіна Іванаўна прысвяціла Нацыянальнай бібліятэцы Беларусі больш за 40 гадоў (1973–2013). Яе прафесійная дзейнасць была звязана з аддзеламі абслугоўвання чытачоў, беларускай літаратуры і бібліяграфіі, навукова-даследчым аддзелам бібліяграфіі.
Г.І. Антонава ў сваёй прафесіі была сапраўдным майстрам. Яна стаяла ля вытокаў распрацоўкі методыкі аўтаматызацыі бібліяграфічных працэсаў, якія патрабуюць глыбокага вывучэння складанага матэрыялу, добрых арганізатарскіх і рэдактарскіх здольнасцей. Унесла значны ўклад у развіццё беларускай гістарычнай бібліяграфіі. Пры яе непасрэдным удзеле стваралася і развівалася база даных “Гісторыя Беларусі”, на аснове якой у пачатку 1990-х гг. выйшла некалькі выпускаў друкаванага бібліяграфічнага ўказальніка “Новая літаратура па гісторыі і гістарычных навуках Беларусі”. Галіна Іванаўна таксама прымала ўдзел у падрыхтоўцы электронных рэсурсаў “Беларусь у Вялікай Айчыннай вайне” (2005), “Паклонімся вялікім тым гадам: 65-годдзю Вялікай Перамогі прысвячаецца” (2010), бібліяграфічных указальнікаў “Чарнобыль” (1993–1996) “Мікалай Мікалаевіч Улашчык” (2006). Удзельнічала ў фарміраванні камбінаванай БД "Беларусь: ад мінулага да сучаснага", распрацоўцы і інфармацыйным напаўненні ЭІР “Нацыянальная бібліяграфія Беларусі”.
Дзякуючы сваім прафесійным якасцям і навыкам сапраўднага бібліёграфа Г.І. Антонава заўсёды была адказным настаўнікам, прыкладам для маладых калег. За шматгадовую высокапрафесійную добрасумленную працу, значны асабісты ўклад у развіццё нацыянальнай бібліяграфіі неаднаразова атрымлівала падзякі Нацыянальнай бібліятэкі Беларусі, была ўзнагароджана Ганаровай граматай Савета Міністраў Рэспублікі Беларусь.
Яе гумар і пазітыўны настрой ішлі рука ў руку з адказнасцю, бібліяграфічнай скрупулёзнасцю, уважлівым стаўленнем да працы і людзей, што заўсёды стварала зону спакою і камфорту для навакольных.
Матэрыял пададзены навукова-даследчым аддзелам бібліяграфіі.