З нагоды юбілею ўсенародна любімага пісьменніка Уладзіміра Караткевіча Нацыянальная бібліятэка Беларусі атрымала неверагодна каштоўны падарунак ад вядомага беларускага графіка Юрыя Якавенкі – афорт “Nicola. Да вокладкі кнігі «Дзікае паляванне караля Стаха»”, зроблены ў тэхніцы меца-тынта.
Гравюра надрукавана італьянскім выдаўцом Джуліана Якамучы ў 2010 г. Зараз работу можна пабачыць сярод шэрагу іншых цікавых і адметных экспанатаў літаратурна-мастацкай выстаўкі “Княства вобразаў і слоў”, прысвечанай 90-годдзю з дня нараджэння класіка беларускай літаратуры.
Юбілейнае чатырохмоўнае выданне “Дзікае паляванне караля Стаха” (2010), аздобленае непаўторнай графікай Юрыя Якавенкі, таксама можна ўбачыць у экспазіцыі і фондах бібліятэкі.
Калекцыя выяўленчых матэрыялаў Нацыянальнай бібліятэкі Беларусі таксама папоўніцца падарункамі ад беларускага мастака Ігара Кашкурэвіча – графічнай серыяй “Экалогія” і літаграфіямі да аповесці Васіля Быкава “Сотнікаў”.
Вялікі і шчыры дзякуй, паважаныя майстры! Здароўя і творчага натхнення вам!
Матэрыял пададзены аддзелам галерэйна-выставачнай дзейнасці.