25 студзеня а 17-й гадзіне ў галерэі “Лабірынт” адбудзецца прэзентацыя кнігі “Іван Шамякін. Летапісец эпохі: успаміны, інтэрв'ю, эсэ” і ўрачыстае адкрыццё юбілейнай кніжнай выстаўкі да 90-годдзя пісьменніка.
Напярэдадні 90-годдзя з дня нараджэння народнага пісьменніка Беларусі, Героя Сацыялістычнай Працы, лаўрэата шматлікіх дзяржаўных прэмій і ўзнагарод Івана Пятровіча Шамякіна Нацыянальная бібліятэка Беларусі сумесна з выдавецтвам “Мастацкая літаратура” прэзентуе юбілейную кніжную выстаўку, прысвечаную жыццю і творчай спадчыне пісьменніка, і біяграфічную кнігу “Іван Шамякін. Летапісец эпохі: успаміны, інтэрв’ю, эсэ”.
На кніжнай выстаўцы прадстаўлена каля 200 выданняў, сярод якіх зборы твораў Івана Шамякіна, выдадзеныя Саюзам пісьменнікаў Беларусі і выдавецтвам “Мастацкая літаратура”; асобныя творы, за якія пісьменнік атрымаў шэраг узнагарод; біяграфічныя і літаратуразнаўчыя публікацыі беларускіх даследчыкаў.
Кніга “Іван Шамякін. Летапісец эпохі: успаміны, інтэрв’ю, эсэ” выйшла ў папулярнай і прэстыжнай серыі “Жыццё знакамітых людзей Беларусі”. У гэтай кнізе, падрыхтаванай да друку дачкой вядомага празаіка, кандыдатам філалагічных навук Алесяй Іванаўнай Шамякінай, праз успаміны сваякоў, сяброў, літаратараў, архітэктараў узнікае партрэт Мастака і Чалавека ва ўсёй яго філасофскай велічы і прыгажосці.
У мерапрыемстве возьмуць удзел прадстаўнікі Міністэрства культуры Рэспублікі Беларусь, Нацыянальнай бібліятэкі Беларусі, выдавецтва “Мастацкая літаратура”, дочкі пісьменніка Алеся і Таццяна Шамякіны, а таксама прадстаўнікі творчай супольнасці.
Выстаўка «Летапісец эпохі» будзе доўжыцца з 25 студзеня па 7 сакавіка ў кальцавым калідоры 2-га паверха.
Тэлефоны для даведак: 293-27-67, 293-29-80.Е-mail: pr@nlb.by
