13 снежня адкрыецца выстаўка «Каманда», якая прэзентуе работы, створаныя выкладчыкамі кафедры дызайну факультэта сацыякультурных камунікацый БДУ.
Калектыў кафедры, які склаўся 12 гадоў назад, прадставіць гледачу сваю творчасць сённяшняга дня. Азнаёміўшыся з экспазіцыяй, кожны адкрые для сябе цэлы свет, які сабраў такіх розных дызайнераў, мастакоў, архітэктараў у адну каманду, даведаецца пра шэраг падзей і фактаў, якія садзейнічалі гэтаму творчаму саюзу.
У сваёй выстаўцы спецыялісты пастараліся ўзнавіць атмасферу калектыўнага пошуку новага, аўтарскага, індывідуальнага. Таму работы звязвае не выкарыстанне тэматычнага адзінага сюжэту або тэхналогіі, а агульнае бачанне каманднага духу кафедры дызайну. На думку аўтараў, менавіта ў разнастайнасці прадстаўленых у экспазіцыі работ глядач зможа ўбачыць заканамернасці кафедральнага “мы” і індывідуальнага “я”.
Вернісаж пачнецца а 16-й гадзіне ў галерэі “Ракурс” (2-гі паверх).
Наведаць экспазіцыю можна да канца студзеня 2017 года.
Тэлефоны для даведак: (8 017) 293 27 56, 293 28 33.
Е-mail: pr@nlb.by
