У музеі кнігі Нацыянальнай бібліятэкі Беларусі на юбілейнай выставе “5+5+5” дэманструецца адзіны ў свеце зборнік вершаў беларускіх паэтаў.
Гэта кніга была надрукавана ў 1 экзэмпляры (Мінск, 1999) па ініцыятыве рэспубліканскага літаратурна-мастацкага фонда “Гронка”. Выданне мініяцюрнае. Мае памер 100х65 мм. Для сувенірнай кнігі быў выкананы адмысловы пераплёт з сіняга аксаміту на кардоне, упрыгожаны ажурнымі філіграннымі накладкамі.
Зборнік складаецца з трох раздзелаў, якія ўключаюць вершы трох паэтаў: Сяргея Законнікава, Анатоля Зэкава, Алеся Пісьмянкова. На пачатку кожнага раздзела ёсць дароўныя надпісы аўтараў: “Жадаю шчасця! Сяргей Законнікаў”; “Пад ветразем кахання – да сэрцаў яднання! Ан. Зэкаў”; “Няхай Вам скрыюць зоры! Алесь Пісьмянкоў”.
Сёння свой 75-гадовы юбілей адзначае адзін з ініцыятараў стварэння кнігі – выдатны беларускі паэт, перакладчык, публіцыст Сяргей Законнікаў. Хочацца пажадаць пісьменніку здароўя і, як некалі ён занатаваў у аўтографе да чытачоў бібліятэкі: “…шчасця!”.
Шукайце ўнікальны зборнік вершаў беларускіх паэтаў сярод пяцёркі рэдкіх кніг на выставе “5+5+5”.
Выстава “5+5+5” будзе працаваць у музеі кнігі да 24 кастрычніка 2021 г.
Дата яе завяршэння можа быць зменена.
Час работы выставы адпавядае рэжыму работы музея кнігі.
Уваход – па чытацкім білеце або білеце сацыякультурнага цэнтра.
Матэрыял пададзены навукова-даследчым аддзелам кнігазнаўства.