19 студзеня 2008 года ў дзіцячым пакоі Нацыянальнай бібліятэкі Беларусі прайшло забаўляльна-пазнавальнае мерапрыемства для дзяцей "Зімовае падарожжа па старонках казак".
Дзеці здзейснілі займальнае падарожжа ў горад Казкаград, дзе іх чакалі вясёлыя прыгоды і сюрпрызы. На вуліцы "Снежнай" дзеці адгадвалі, з якой казкі прыляцелі сняжынкі. Наведаўшы вуліцу "Прафесійную", яны выбіралі прафесіі для казачных герояў, а потым самі ператварыліся ў спартсменаў і праводзілі гульню "Снежкі", удзельнічалі ў конкурсах "Збяры пралескі" і "Ялінка". На плошчы "Антарктычнай" маленькія вандроўнікі зрабілі сваімі рукамі з каляровай паперы пацешных пінгвінаў. Напрыканцы падарожжа на плошчы "Тэатральнай" адбыўся паказ казкі "Рукавічка", на якім дзеці самі сталі рэжысёрамі і акцёрамі. Бацькі назіралі за ўсім, што адбывалася, былі ўдзячнымі гледачамі і ўзнагародзілі маленькіх артыстаў гарачымі апладысментамі.