Пабачыць лепшыя беларускія кнігі, выдадзеныя цягам мінулага і бягучага гадоў, можна ў Маскве, на XVI Нацыянальнай выстаўцы-кірмашы “Кнігі Расіі”, што праходзіць з 13 па 17 сакавіка ва Усерасійскім выставачным цэнтры.
На калектыўным стэндзе нашай краіны – прадукцыя вядучых выдавецтваў: “Беларусь”, “Беларуская Энцыклапедыя імя Петруся Броўкі”, РВУ “Выдавецкі дом «Звязда»”, “Вышэйшая школа”, “Народная асвета”, “Мастацкая літаратура”, “Беларуская навука”, “Аверсэв”, “Пачатковая школа”, “Паліграфкамбінат імя Якуба Коласа” і РУП “Белкартаграфія”.
Выдавецкі дом “Звязда” прапануе ўвазе гасцей дзве вельмі цікавыя прэзентацыі.
Па-першае, гэта фактычна тэатралізаванае прадстаўленне дзіцячай кнігі Наталлі Ігнаценкі “Казачныя падарожжы з прыгодамі”. Знаёмства з кнігай дапоўняць інсталяцыі, зробленыя аўтаркай.
Другая прэзентацыя – першая ластаўка з серыі “Сугучча сэрцаў”, творчага праекта выдавецкага дома “Звязда” і Міністэрства інфармацыі Беларусі, – кніга “З думай пра Радзіму”. У выданні змешчаны паэтычныя і празаічныя творы сучасных беларускіх і расійскіх аўтараў.
Яшчэ адзін праект, які не можа застацца па-за ўвагай наведвальнікаў, належыць выдавецтву “Беларуская Энцыклапедыя імя Петруся Броўкі”, а таксама Дэпартаменту сродкаў масавых камунікацый і рэкламы горада Масквы. Гэта кніга-альбом “Белорусы Москвы. XVІІ в.”, што распавядае пра ўнёсак беларускіх майстроў у культуру, найперш архітэктуру, расійскай сталіцы.
Крыніца: газета “Літаратура і мастацтва”, 15.03.2013
Чытайце таксама:
