З 22 мая на нашым партале адкрываецца пастаянная тэматычная рубрыка, у якой шматгранна і лаканічна будзе давацца інфармацыя аб асноўных знамянальных падзеях і выбітных асобах айчыннай гісторыі і культуры.
Мінулае Беларусі захоўвае шмат гераічных і трагічных падзей, цікавых, часам спрэчных, фактаў. Беларуская зямля багата на асобы, якія праславілі сваю радзіму ў самых розных сферах грамадскага жыцця. Гэта зафіксавана ў гістарычных крыніцах, бачна на мапах і выявах, асэнсавана ў разнастайных публікацыях і ўспамінах.
У новай рубрыцы партала прапануем знаёміцца з асобнымі падзеямі мінулага нашай краіны, славутымі землякамі і выкарыстоўваць шырокі спектр інфармацыйных рэсурсаў пра іх. Гэта будуць лаканічныя тэматычныя даведкі (часам з фотаздымкамі і выявамі, фрагментамі гістарычных крыніц), а таксама спасылкі на разнастайныя інфармацыйныя рэсурсы НББ. Галоўная бібліятэка краіны захоўвае самы вялікі ў свеце фонд беларускіх нацыянальных дакументаў і на працягу амаль 100 гадоў акцэнтуе сваю аналітычна-інфармацыйную дзейнасць на беларусазнаўстве. Яе бібліяграфічная і фактаграфічная друкаваная прадукцыя, базы даных і мультымедыйныя выданні, тэматычныя віртуальныя праекты і лічбавыя калекцыі раскрываюць розныя бакі гісторыі і культуры Беларусі.
Мы спадзяёмся, што рубрыка “Па старонках беларускага календара” зацікавіць аматараў айчыннай гісторыі, навукоўцаў, навучэнцаў і выкладчыкаў, а таксама ўсіх, хто шануе беларускую культуру і нацыянальную спадчыну. Матэрыялы будуць рэгулярна публікавацца ў стужцы навін партала НББ і асобным блокам захоўвацца на сайце “Беларусь у інфармацыйнай прасторы”.
Да сустрэчы з беларускай гісторыяй!
Матэрыял падрыхтаваны навукова-даследчым аддзелам бібліяграфіі.
